नवीनच... काय तर म्हणे महिला डॉक्‍टरने चिमटे घेतले!, चिकलठाण्याच्या मिनी घाटीत हे काय घडलं...

By City News Desk

On 31 Jul 2025

नवीनच... काय तर म्हणे महिला डॉक्‍टरने चिमटे घेतले!, चिकलठाण्याच्या मिनी घाटीत हे काय घडलं...

छत्रपती संभाजीनगर (सीएससीएन वृत्तसेवा) : चिकलठाण्यातील मिनी घाटीत आगळावेगळाच प्रकार समोर आला आहे. तपासताना महिला डॉक्टरने चिमटे घेतल्याचा आरोप गर्भवतीने केला आणि नंतर तिच्या नातेवाइकांनी गोंधळ घालत प्रसूती कक्षाच्या दाराच्या काचा फोडल्या. ही विचित्र घटना बुधवारी (३० जुलै) रात्री आठच्या सुमारास घडली. नातेवाइक महिला डॉक्टरवर धावून जात होते. सुरक्षारक्षक व पोलिसांनी वेळीच धाव घेऊन परिस्थितीवर नियंत्रण मिळवले.

नक्‍की काय घडलं?
मिनी घाटी रुग्णालयात गरोदर महिला आली. महिला डॉक्टरांनी तिची तपासणी सुरू केली असता ती कक्षातून बाहेर पडू लागली. महिला डॉक्टरांनी नातेवाइकांशी संवाद साधून तिला पुन्हा तपासणीसाठी घेतले. मात्र ती पुन्हा बाहेर पडू लागली. त्यानंतर गर्भवतीने चक्क महिला डॉक्‍टरांवर चिमटे घेत असल्याचा आरोप लावला. पुरुष नातेवाइकांनी लगेचच गोंधळ घालायला सुरुवात केली. तोडफोड करत प्रसूती कक्षाच्या प्रवेशद्वाराच्या काचा फोडल्या. ते महिला डॉक्‍टरांवर धावून जात होते. त्‍यामुळे एकच गोंधळ उडाला. पोलिसांना कळवताच त्‍यांनी रुग्णालयात धाव घेतली. अतिरिक्त जिल्हा शल्यचिकित्सक डॉ. भूषणकुमार रामटेके यांनी सांगितले, की गर्भवतीला चिमटे घेतल्याचा आरोप करत गोंधळ घालण्यात आला. मात्र असे तसे काही घडले नाही. वृत्त लिहीपर्यंत याप्रकरणात पोलिसांत गुन्हा दाखल झाला नव्हता.