छत्रपती संभाजीनगरच्या ‘या’ गावात झाला जिल्ह्यातील सर्वात मोठा भंडारा!; १३५ क्विंटल पोळ्यांचा महाप्रसाद, तात्या बाबांची महती का आहे इतकी मोठी, जाणून घेऊ...

By City News Desk

On 30 Jul 2025

छत्रपती संभाजीनगरच्या ‘या’ गावात झाला जिल्ह्यातील सर्वात मोठा भंडारा!; १३५ क्विंटल पोळ्यांचा महाप्रसाद, तात्या बाबांची महती का आहे इतकी मोठी, जाणून घेऊ...

लाडसावंगी, ता. छत्रपती संभाजीनगर (सीएससीएन वृत्तसेवा) : मुरूमखेडा (ता. छत्रपती संभाजीनगर) येथे आज, ३० जुलैला तात्या बाबांचा भंडारा महोत्सव झाला. हा महोत्सव जिल्ह्यात उत्सुकतेचा असतो. आख्यायिका आहे, की साप, विंचवाने चावा केला की तात्या बाबाचे नाव घेऊन जमिनीची माती लावली की बरे होते. तब्बल १३५ क्विंटल पोळ्यांचा महाप्रसाद भंडाऱ्यात करण्यात आला. त्यामुळे जिल्ह्यातील आजवरचा सर्वात मोठा भंडारा ठरला आहे. विक्रमी आयोजनाने तात्या बाबांवरील भक्तांची असीम श्रद्धा आणि ग्रामस्थांची एकजूट काम दिसून आले.

भव्यदिव्य भंडाऱ्यासाठी जय्यत तयारी करण्यात आली होती. सुमारे ४० क्विंटल लिंबू-मिरची, ३० क्विंटल तूरडाळीचे वरण करण्यात आले होते. सकाळी दहापासून ते रात्री बारापर्यंत भंडारा चालू होता. लाडसावंगी पिंपळखुटा, औरंगपूर, चारठा, सेलूद, अंजनडोह, नायगव्हाण, आडगावसह चाळीस ते पन्नास गावांचे लोक या भंडाऱ्यासाठी येतात. रात्री भजने, वाघ्या मुरळीचे आयोजन केलेले असते.

आज सकाळपासूनच भाविकांची गर्दी उसळली होती. पाण्याच्या व्यवस्थेसाठी विशेष लक्ष देण्यात आले होते. विहिरीतून थेट पाइपलाइनद्वारे नळ जोडून पाण्याची चोख व्यवस्था करण्यात आली होती. आयोजनासाठी अनेक स्वयंसेवकांनी अथक परिश्रम घेतले. विक्रमी भंडाऱ्यामुळे मुरूमखेडा गावाचे नाव जिल्ह्यात चर्चेचा विषय बनले आहे. तात्या बाबांवरील श्रद्धेचे प्रतीक म्हणून हा भंडारा कायम स्मरणात राहील, अशी भावना अनेकांनी व्यक्त केली.