छत्रपती संभाजीनगरात थोड्याच्या पैशांसाठी चिमुकल्यांच्या जिवाशी खेळ, क्षमतेपेक्षा जास्त खच्‍चून भरल्या जातात स्‍कूल व्हॅन, रिक्षा, पोलिसांनी केली २३३ वाहनांची तपासणी

छत्रपती संभाजीनगर (सीएससीएन वृत्तसेवा) : थोड्याच्या पैशांसाठी चिमुकल्यांच्या जिवाशी खेळ करणाऱ्या स्‍कूल बस, व्हॅन आणि रिक्षाचालकांवर वाहतूक पोलिसांनी मंगळवारी (२९ जुलै) कारवाई केली. यापुढेही कारवाई सुरूच राहणार आहे. २३३ वाहनांची तपासणी केली, त्‍यात १२१ चालक सदोष पद्धतीने वाहतूक करत होते. सहायक पोलीस आयुक्त धनंजय पाटील यांनी पत्रकारांना कारवाईची माहिती दिली. त्यांनी सांगितले, की ४० टक्के रिक्षाचालकांकडे रिक्षाचा परवानाच नव्हता.

स्कूल बसमध्ये सीसीटीव्ही कॅमेरे, मदतनीस म्हणून महिला कर्मचारी बंधनकारक आहे, मात्र अनेक स्कूल व्हॅनमध्ये कॅमेरेच नव्हते, तर काही बसमधील कॅमेरे बंद होते. कॅमेरे सुस्थितीत आहेत की नाही, हे तपासण्याची जबाबदारी शाळांचीच असून, पुढील काही दिवस शहरात मोहीम प्रभावीपणे  राबवणार असल्याचे धनंजय पाटील यांनी बजावले. २३३ स्कूल बस, व्हॅन व रिक्षांची तपासणी केली. यात १२१ रिक्षाचालकांवर कारवाई करत १ लाख १० हजारांचा दंड ठोठावला आहे, असेही त्यांनी सांगितले.

पोलीस आयुक्तालयात पोलीस आयुक्त प्रवीण पवार, पोलीस अधीक्षक डॉ. विनयकुमार राठोड, प्रादेशिक परिवहन अधिकारी विजय काठोळे यांच्या प्रमुख उपस्थितीत सोमवारी (२८ जुलै) जिल्हा स्कूल बस सुरक्षितता समितीची बैठक झाली. बैठकीत मंगळवारपासून बेजबाबदारपणे विद्यार्थी वाहतूक करणाऱ्यांवर कारवाईचे ठरले होते. त्‍यानुसार प्रमुख शाळा, मार्गावर कारवाईसाठी वाहतूक पोलीस सरसावले.

धक्कादायक बाबी समोर...
-टेम्पो व्हॅनमध्ये २० पेक्षा अधिक, तर रिक्षांत १२ पेक्षा अधिक विद्यार्थ्यांची वाहतूक.
-छावणी परिसरात दोन बसमध्ये सीसीटीव्ही कॅमेरे नव्हते.
-शाळांकडे त्यांच्या विद्यार्थ्यांची वाहतूक करणाऱ्या रिक्षाचालकांची नोंदच नसते.
-जवळपास १० टक्के वाहनांचे नव्हते फिटनेस सर्टिफिकेट.
-१७ व्हॅनचालकांकडून विनागणवेश, विनापरवाना वाहतूक.

काय आहे नियमावली...
-६ वर्षांखालील मुलांना ने-आण करताना महिला कर्मचाऱ्यांची नियुक्ती करावी.
-वाहनचालक, कंडक्टर, क्लीनरची पोलीस पडताळणी करून घ्यावी.
-वाहनचालक प्रशिक्षित, नैतिकदृष्ट्या सक्षम असल्याची खात्री परिवहन समितीने करावी.
-चालक व अटेंडंट यांचे चारित्र्य पडताळणी, नेत्र आणि वैद्यकीय तपासणी करून घ्यावी.
-सीसीटीव्ही कॅमेरा प्रत्येक बसमध्ये बसवणे बंधनकारक.