दोन संतापजनक घटना : साडी खरेदीस आलेल्या विवाहितेकडे पाहून सेल्समनचे अश्लील चाळे!, पैठण गेट भागातील घटनेने तणाव; टीव्ही सेंटर भागात विद्यार्थिनीचा पाठलाग करणाऱ्या दोन रोडरोमिओंना चोप!

छत्रपती संभाजीनगर (सीएससीएन वृत्तसेवा) : राखी पौर्णिमेसाठी साडी खरेदी करण्यास पैठण गेट भागातील दुकानात आलेल्या युवतीकडे बघून सेल्समन अल्पवयीन तरुणाने अश्लील चाळे केले. ही बाब युवतीने भावाला सांगितली. ते लक्षात येताच जहीर (नाव बदलले आहे) मागच्या दरवाजाने पळून गेला. दुकानमालकाकडून नाव, पत्ता घेत युवतीच्या भावाने युवा सेनेच्या पदाधिकाऱ्यांना कळवले. लगेचच युवा सेनेचे आदित्य दहिवाळ हे पदाधिकाऱ्यांसह तिथे आले. जहीरच्या समर्थनार्थ लगेचच दुसरा बाजूचा जमावही जमला. दोन गट आमने-सामने आले होते. नंतर या प्रकरणाची तक्रार पोलिसांत करण्यात आली. क्रांती चौक पोलिसांनी विधिसंघर्ष बालकाविरुद्ध गुन्हा दाखल करण्यात आला. हा धक्कादायक प्रकार बुधवारी (३० जुलै) सायंकाळी पाचच्या सुमारास घडला.

छत्रपती संभाजीनगरची लेक असलेल्या ३२ वर्षीय युवतीचे सासर जळगाव आहे. ती माहेरी आलेली होती. राखी पौर्णिमेला तिला पुन्हा माहेरी येणे शक्य नसल्याने तिच्याच पसंतीची साडी घ्यावी म्हणून भावाने आईसह पैठण गेट परिसरातील दुकानात नेले. त्यांना दुकानातील २ साड्या पसंत पडल्या. त्या खांद्यावर टाकून आरशासमोर बघत आईला दाखवत असताना दुकानात सेल्समन म्हणून काम करणारा १७ वर्षीय तरुण चेंजिंग रूमचे दार उघडे ठेवून तिच्याकडे पाहून अश्लील चाळे करत होता.

३ वेळा युवतीकडे बघून त्‍याने अश्लील चाळे केल्याचे युवतीने भावाला सांगितले. तिने भावाला सांगितल्याचे लक्षात येताच जहीरने लगेचच दुकानाच्या मागच्या दरवाजाने पळ काढला. भावाने दुकानमालकाला सांगितल्यावर दुकानमालकाने त्‍या तरुणाचे नाव, पत्ता सांगितला. युवतीच्या भावाने युवा सेनेच्या पदाधिकाऱ्यांना कळवताच आदित्य दहिवाळ हे सहकाऱ्यांसह आले. जहीरच्या समर्थनार्थ लगेचच दुसरा गटही दुकानासमोर आला. नंतर या प्रकरणात क्रांती चौक पोलिसांत तक्रार करण्यात आली. पोलीस निरीक्षक सुनील माने यांनी अल्पवयीन तरुणाविरुद्ध गुन्हा दाखल केला आहे. अधिक तपास केला जात आहे.

टीव्ही सेंटर भागात रोडरोमिओंची युवा सेनेच्या कार्यकर्त्यांनी केली धुलाई
टीव्ही सेंटर भागात युवा सेनेच्या कार्यकर्त्यांनी दोन रोडरोमिओंची मंगळवारी (२९ जुलै) चांगलीच धुलाई केली. अभ्यासिकेतून रूमवर परतणाऱ्या तरुणीचा पाठलाग करून त्‍यांनी छेड काढली होती. टीव्ही सेंटर भागात स्पर्धा परीक्षेची तयारी करणाऱ्या, कॉलेजमध्ये शिकणाऱ्या अनेक तरुणी राहतात. अभ्यासिकेतून रात्री खोलीवर जातात. मंगळवारी रात्री एक तरुणी खोलीकडे जात असताना दोन रोडरोमिओंनी पाठलाग सुरू केला. तिची छेड काढायला सुरुवात केली. ही माहिती मिळताच युवा सेनेचे पदाधिकारी स्वप्निल भांगे हे सहकाऱ्यांसह घटनास्‍थळी धावले. त्यांनी रोडरोमिओंना जाब विचारत चांगलीच धुलाई सुरू केली. मुलीची माफी मागायला लावून यापुढे छेड काढणार नाही, असे रोडरोमिओंकडून वदवून घेतले. सिडको पोलीस ठाण्यात या घटनेची नोंद नव्हती.