रेकॉर्डिंगसाठी मोबाइल ठेवून फार्मसीच्या २१ वर्षीय विद्यार्थिनीची किरायाच्या खोलीत आत्‍महत्‍या!, छत्रपती संभाजीनगर शहरातील धक्कादायक घटना

छत्रपती संभाजीनगर (सीएससीएन वृत्तसेवा) : बी. फार्मसीच्या तिसऱ्या वर्षात शिकणाऱ्या विद्यार्थिनीने गळफास घेऊन आत्महत्या केली. ही धक्कादायक घटना बुधवारी (३० जुलै) दुपारी १ वाजता सिडको एन ७ च्या ग्रिव्हिल कॉलनीत समोर आल्यानंतर एकच खळबळ उडाली. कल्याणी परमेश्वर वायाळ (वय २१, मूळ रा. सावरगाव वायाळ, पिंपरखेड, ता. मंठा, जि. जालना, ह. मु. ग्रिव्हिल कॉलनी, छत्रपती संभाजीनगर) असे आत्‍महत्‍या केलेल्या विद्यार्थिनीचे नाव आहे.

शेतकरी कुटुंबातील कल्याणी काही महिन्यांपासून शिक्षणासाठी ग्रिव्हिल कॉलनीतील प्रताप डकवा यांच्या घरात वर्गमैत्रिणींसह किरायाने राहत होती. श्री साई इन्स्टिट्यूटमध्ये ती बी. फार्मसीच्या तिसऱ्या वर्षात शिकत होती. बुधवारी सकाळी नेहमीप्रमाणे सर्व मैत्रिणींनी मिळून स्वयंपाक केला. कल्याणीने भाजी बनवली. तिघी मैत्रिणी डबा घेऊन कॉलेजला गेल्या. कल्याणी घरीच थांबली होती. दुपारी कॉलेजमधून मैत्रिणी घरी आल्यानंतर कल्याणीने दरवाजा उघडला नाही. त्यामुळे मैत्रिणींनी खिडकीतून डोकावले असता कल्याणी गळफास घेतलेल्या अवस्थेत दिसली.

सिडको पोलिसांना कळवताच सहायक पोलीस निरीक्षक योगेश गायकवाड यांनी सहकाऱ्यांसह घटनास्‍थळी धाव घेतली. दरवाजा तोडून रूममध्ये प्रवेश केला. कल्याणीचा मोबाइल समोर एका फळीवर उभ्या अवस्थेत होता. व्हिडीओ रेकॉर्डिंग किंवा व्हिडीओ कॉल करण्याच्या स्थितीत मोबाइल ठेवल्याचा संशय आहे. मोबाइल लॉक असल्याने फॉरेन्सिक विभागाच्या तपासणीनंतरच नेमका प्रकार समोर येणार असल्याचे पोलिसांनी सांगितले. कल्याणीचा मृतदेह फासावरून काढून घाटी रुग्णालयात आणला. कल्याणी शिक्षण घेतानाच अनुभवासाठी सिडको परिसरातीलच एका मेडिकलमध्ये काम करत होती. तिला दोन बहिणी, एक भाऊ आहे. घटनेची नोंद सिडको पोलिसांनी घेतली आहे. कल्याणीच्या आत्‍महत्‍येचे कारण शोधले जात आहे.