सैराट पार्ट २ : आधी हॉस्पिटलसमोरून पळवले होते, पोलिसांनी पकडून आणले, आता पुन्हा घरातून प्रेयसीला नेले... मुलगी दहावीत शिकते, मुलगा २१ वर्षांचा, बजाजनगरातील खळबळजनक घटना

छत्रपती संभाजीनगर (सीएससीएन वृत्तसेवा) : वैजापूर तालुक्‍यातील पालखेड येथील २१ वर्षीय तरुण प्रेमात अक्षरशः वेडापिसा झाल्याचे समोर येत आहे. मात्र त्‍याची प्रेयसी अल्पवयीन आहे. ती १५ वर्षांची असून, १० वीत शिकते. त्‍यामुळे तो कायद्याच्या जंजाळात वारंवार अडकत आहे. यापूर्वी २१ एप्रिलला दोघे वाळूज एमआयडीसीच्या महावीर चौकातील सिद्धीविनायक हॉस्पिटलसमोरून पळून गेले होते. त्‍यावेळी त्‍याच्यासह त्‍याला मदत करणाऱ्या दोन मित्रांविरुद्ध अपहरणाचा गुन्हाही दाखल झाला होता. पोलिसांनी दोघांना शोधून आणले होते. आता पुन्हा शुक्रवारी (१ ऑगस्ट) त्‍याने आपल्या अल्पवयीन प्रेयसीला दुचाकीवरून पळवून नेले आहे. या घटनेमुळे खळबळ उडाली आहे. यात त्‍याला पुन्हा एका मित्राने मदत केली, हे विशेष.

मच्छिंद्र त्रिभुवन (वय २१, रा. पालखेड ता. वैजापूर) असे या प्रियकराचे नाव असून, सागर गणेश शिंदे या मित्राने त्‍याला यावेळी मदत केल्याचे तक्रारीत मुलीच्या पित्‍याने म्‍हटले आहे. वाळूज एमआयडीसी पोलिसांनी दोघांविरुद्ध गुन्हा दाखल केला आहे. आताच्या तक्रारीनुसार, शुक्रवारी दुपारी चारला मुलीचे वडील छत्रपती संभाजीनगर शहरात कामानिमित्त गेले होते. सायंकाळी साडेपाचला ते परतले असता त्‍यांच्या मुलाने सांगितले, की पूजाला (नाव बदलले आहे) ऋषिकेश व सागर यांनी मोटारसायकवलीवर बसवून जबरदस्ती पळवून नेले आहे. यावेळी जाताना पूजाने घरातील कपाटातील २० हजार रुपये, आईचे सोन्याचे कानातले तीन ग्रॅमचे झुंबर, सोन्याची एकदानीही नेली आहे. अधिक तपास पोलीस उपनिरीक्षक अरविंद शिंदे करत आहेत.

यापूर्वीचे पलायन...
मुलीच्या आईची प्रकृती ठिक नसल्याने २० एप्रिल २०२५ रोजी रात्री ९ वाजता वाळूज आयडीसीतील महावीर चौकातील सिद्धीविनायक हॉस्पिटलमध्ये दाखल केले होते. त्यांच्या १५ वर्षीय मुलगीही होती. २१ एप्रिलला सायंकाळी पाच वाजता वडील डॉक्टरांसोबत असताना मुलगी हॉस्पिटलबाहेर बसलेली होती. सायंकाळी सहाला तिच्या वडिलांनी हॉस्पिटलबाहेर येऊन पाहिले असता मुलगी दिसून आली नाही. तिला ऋषिकेशने दुचाकीवरून पळवून नेले होते.