डिजिटल अरेस्ट रॅकेट छत्रपती संभाजीनगरातून?; तामिळनाडूच्या पोलिसांनी वाळूज MIDC तून दोघांना केली अटक

छत्रपती संभाजीनगर (सीएससीएन वृत्तसेवा) : सध्या देशात डिजिटल अरेस्ट हे सायबर भामट्यांचे कुटील कारस्थान चर्चेत आहे. छत्रपती संभाजीनगरातही अनेकांना या प्रकारे लुटण्यात आले आहे. या रॅकेटमध्ये छत्रपती संभाजीनगरच्या दोघांना सहभाग आढळल्‍याने खळबळ उडाली आहे. तामिळनाडू पोलिसांनी शहरातील वाळूज एमआयडीसीत कारवाई करत श्रीकांत सुरेशराव गाडेकर (वय ३४, रा. वडगाव कोल्हाटी, छत्रपती संभाजीनगर), नरेश कल्याणराव शिंदे (वय २६, रा. आर्यन सिटी, तिसगाव चौफुली, वाळूज महानगर) या भामट्यांना अटक केली. ते अनेक दिवसांपासून दिवसभर देवळाई परिसरात हॉटेलमध्ये खोली बुक करून डिजिटल अरेस्टचा खेळ खेळत होते. त्‍यांच्या खात्‍यात १ कोटी ३६ लाख रुपये असल्याचे समोर आले.

तामिळनाडूतील तांबारम पोलिसांच्या पथकासह ग्रामीण पोलिसांच्या गुन्हे शाखेने श्रीकांत आणि नरेशच्या शोधात दोन दिवस शहरासह ग्रामीण पोलीस हद्दीत शोधमोहीम राबवली. सूत्रांच्या माहितीनुसार, चेन्नईच्या तिरूवनचेरी येथील सेवानिवृत्त कर्मचारी प्रभाकरन कुंधू चंद्रन रुवी यांना दिल्ली सायबर पोलीस असल्याचे भासवून भामट्यांनी कॉल केला. कॅनरा बँकेतील खात्यातून मनी लॉन्ड्रिंग (मनी लॉन्ड्रिंग म्हणजे काळ्या पैशाला कायदेशीर उत्पन्न असल्याचे भासवणे किंवा त्या पैशाचे स्रोत लपवणे. थोडक्यात सांगायचे झाले तर, हा अवैधरित्या मिळवलेल्या पैशाचा कायदेशीर आर्थिक व्यवहारात समावेश करण्याचा एक गुन्हेगारी प्रकार आहे.) झाल्याचे सांगून त्यांना कारवाईची धमकी देण्यात आली. त्यानंतर त्‍यांना डिजिटल अरेस्ट करण्यात आले. या अटकेदरम्यान त्यांच्याकडून तब्बल दोन कोटी २७ लाख २४ हजार ९०० उकळण्यात आले होते.

तपास करत छ. संभाजीनगरात आले...
प्रभाकरन यांनी पोलिसांत तक्रार केली. त्याचा तांत्रिक सुरू असताना तामिळनाडू पोलिसांना छत्रपती संभाजीनगरमधून भामटे रॅकेट हाताळत असल्याचे कळले. पोलीस निरीक्षक व्ही. के. सशिकुमार २९ जुलैला पथकासह छत्रपती संभाजीनगरात आले आणि त्‍यांनी पोलीस अधीक्षक डॉ. विनयकुमार राठोड यांची भेट घेतली. पोलीस अधीक्षकांनी त्‍यांच्या मदतीला स्थानिक गुन्हे शाखेचे पोलीस निरीक्षक विजयसिंह राजपूत, सहायक पोलीस निरीक्षक पवन इंगळे, अंमलदार श्रीमंत भालेराव, अशोक वाघ, शिवानंद वनगे यांची टीम दिली. 

देवळाईच्या हॉटेलमधून उचलले...
तपासात दोन्ही भामटे देवळाई चौकातील एका हॉटेलमध्ये असल्याचे निष्पन्न झाले. पोलिसांनी तातडीने हॉटेल गाठत श्रीकांत व नरेशला अटक केली. तामिळनाडू सायबर पोलिसांनी सातारा पोलीस ठाण्यात नोंद करून दोन्ही भामट्यांना सोबत नेले आहे. दोघांनीही इंजिनिअरिंगचे शिक्षण घेतलेले असून, काही दिवस त्‍यांनी खासगी कंपनीत नोकरीही केली आहे. घरातून बाहेर पडताना नोकरीवर जात असल्याचे सांगत होते. पोलिसांनी दोघांकडून ९ मोबाइल जप्त केले. १५ हून अधिक सिमकार्ड, ३ पासबुकही जप्त केले. नरेशचे राहणीमान पोलिसासारखे आहे. डिजिटल अरेस्टमध्ये सावज अडकले, की दोघेही स्वतः पोलीस भासवत. पोलिसांचा गणवेश, पोलिसांचे दालन, मागे तसा सेटअप करून व्हिडीओ कॉलद्वारे विश्वास संपादित करत. यासाठी हॉटेलमध्ये मुक्कामी थांबत होते. दोघेही मोठ्या रॅकेटशी जोडले गेलेले असल्याची शक्‍यता आहे.