प्रेमप्रकरणातून तरुणाला बेदम मारहाण, तू तिला सोड, म्‍हणत लोखंडी पाइप डोक्‍यात घालून केले गंभीर जखमी!; ए.एस. क्‍लबजवळील घटना

By City News Desk

On 02 Aug 2025

प्रेमप्रकरणातून तरुणाला बेदम मारहाण, तू तिला सोड, म्‍हणत लोखंडी पाइप डोक्‍यात घालून केले गंभीर जखमी!; ए.एस. क्‍लबजवळील घटना

छत्रपती संभाजीनगर (सीएससीएन वृत्तसेवा) : प्रेमप्रकरणातून एका तरुणाला अडवून लोखंडी पाइप डोक्‍यात घालत बेदम मारहाण करण्यात आली. यात तरुण जखमी झाला आहे. लिफ्ट घेऊन तरुणाच्या दुचाकीवर बसलेल्या दुसऱ्या एका तरुणालाही नाहक मार खावा लागला. तोही जखमी झाला आहे. हा धक्कादायक प्रकार ए. एस. क्लब परिसरात गुरुवारी (३१ जुलै) मध्यरात्रीनंतर एकच्या सुमारास घडला. या प्रकरणात शुक्रवारी (१ ऑगस्ट) वाळूज एमआयडीसी पोलिसांनी हल्लेखोराविरुद्ध गुन्हा दाखल करण्यात आला आहे.

तानाजी शिंदे (रा. टीव्ही सेंटर, हडको, छत्रपती संभाजीनगर) व प्रवीण खैरनार (रा. धुळे) अशी जखमींची नावे आहेत. तानाजी होमगार्ड असून, दुचाकीने पैठणवरून वाळूज एमआयडीसीतील पंढरपूरकडे जात होते. ए. एस. क्लबजवळ प्रवीणने लिफ्ट मागितली. त्‍यामुळे तानाजी यांनी त्‍याला दुचाकीवर बसवले. वाळूज महानगर पुलाजवळ तानाजीच्या ओळखीचा असलेल्या मनोज नावाच्या व्यक्‍तीने दुचाकी अडवली. या वेळी मनोजसोबत एक अनोळखी व्यक्‍तीही होता.

तानाजीने त्यांना थांबविण्याचे कारण विचारले असता मनोज म्हणाला, की तू एका मुलीवर प्रेम करत आहेस. तिला सोड’. त्यावरून तानाजी आणि मनोजचा वाद सुरू झाला. वाद वाढत जाऊन मनोज आणि त्‍याच्या साथीदाराने जवळील लोखंडी पाइपने तानाजीला बेदम मारहाण करायला सुरुवात केली. तानाजीसोबत प्रवीण असल्याने त्‍यालाही नाहक बेदम मारहाण केली. नंतर दोघेही पळून गेले. तानाजी आणि प्रवीण हे वाळूज एमआयडीसी पोलीस ठाण्यात आले. पोलिसांनी या प्रकरणात मनोज व त्‍याच्या साथीदाराविरुद्ध गुन्हा दाखल करून तपास सुरू केला आहे.