उस्मानपुऱ्यात लोकशाहीर अण्णा भाऊ साठे जयंती मिरवणुकीत पोलिसांवर चाकूहल्ला, १ पोलीस जखमी

By City News Desk

On 02 Aug 2025

उस्मानपुऱ्यात लोकशाहीर अण्णा भाऊ साठे जयंती मिरवणुकीत पोलिसांवर चाकूहल्ला, १ पोलीस जखमी

छत्रपती संभाजीनगर (सीएससीएन वृत्तसेवा) : उस्मानपुऱ्यात लोकशाहीर अण्णा भाऊ साठे यांच्या जयंती मिरवणुकीला गालबोट लागले. मिरवणुकीत सराईत गुन्हेगार आकाश उर्फ गयबा राजू खरे (वय २३) चाकू घेऊन नाचू लागल्याचे पाहून पोलीस त्‍याला पकडण्यासाठी धावले. त्‍याने पोलिसांवर चाकूहल्ला केला. यात पोलीस अंमलदार प्रकाश सुखदेव भालेराव (वय ५५) जखमी झाले. हा धक्कादायक प्रकार शुक्रवारी (१ ऑगस्ट) रात्री आठच्या सुमारास घडला.

या घटनेमुळे काही काळ मिरवणुकीत गोंधळ उडाला होता. पोलिसांनी आकाशला पकडून गुन्हा दाखल केला आहे, अशी माहिती उस्मानपुरा पोलीस ठाण्याचे निरीक्षक अतुल येरमे यांनी दिली. मिरवणूक बंदोबस्तासाठी जवाहरनगर, उस्मानपुरा पोलीस ठाण्यांचे पोलीस गाडे चौकात तैनात होते. आकाश भलामोठा चाकू घेऊन नाचत दहशत माजवत होता. तो चाकू गर्दीत कुणालाही लागून दुखापत होऊ शकत होती. बंदोबस्तावरील पोलीस निरीक्षक अतुल येरमे, पोलीस उपनिरीक्षक गोरे, पोलीस अंमलदार प्रकाश भालेराव यांनी त्‍याला रोखण्यासाठी धाव घेतली. पोलीस गर्दीत शिरताच आकाशने पोलिसांवर चाकूचे वार करायला सुरुवात केली. पहिला वार भालेराव यांच्या गळ्यावर केला. भालेराव यांनी तो चुकवला आणि त्याला मागून पकडले. अक्षयने त्यांच्या हातावर चाकूने वार केले. पोलीस ठाण्यात नेल्यावर आकाश खरे हा पोलीस निरीक्षक येरमे यांच्या अंगावर धावून गेला. त्याने भिंत, गेटवर डोके आपटून घेतले. त्याच्याविरुद्ध यापूर्वी सहा गुन्हे दाखल असून, त्याचा भाऊ संतोष व वडील दोघेही कारागृहात आहेत.