ड्रग्‍ज विकण्यासाठी येताच पोलिसांनी घातली झडप!, चिकलठाण्यात ९० हजारांचे एमडी ड्रग्‍ज जप्त, एकाला अटक, पोलीस पुरवठादाराच्या शोधात

छत्रपती संभाजीनगर (सीएससीएन वृत्तसेवा) : शहरात एमडी ड्रग्‍जचा पुरवठा करणारे रॅकेट समोर येत असून, एका विक्रेत्‍याला चिकलठाण्यातील द्वारकेश मार्केटजवळ अंमलीपदार्थ प्रतिबंधक विभागाने गुरुवारी (३१ जुलै) रात्री साडेनऊला अटक केली. त्‍याच्या चौकशीतून पुरवठादाराचे नाव समोर आले आहे. या पुरवठादाराचा शोध आता पोलीस घेत आहेत. कारवाईत ९० हजारांचे ड्रग्‍ज पोलिसांनी जप्त केले.

शेख अजहर शेख इस्माईल (वय ३१, रा. पुष्पक गार्डन चिकलठाणा) असे पोलिसांनी अटक केलेल्याचे नाव आहे. आलीम शेख ऊर्फ गुड्डू शेख (रा. चिकलठाणा) हा पुरवठादार फरारी आहे. दोघांविरुद्ध पोलीस अंमलदार महेश उगले यांच्या तक्रारीवरून सिडको एमआयडीसी पोलीस ठाण्यात गुन्हा दाखल करण्यात आला आहे. पोलीस निरीक्षक गीता बागवडे यांना गुप्त बातमीदारामार्फत बातमी मिळाली, की एक निळा शर्ट व स्काय ब्लू जिन्स घातलेला युवक चिकलठाणा येथील द्वारकेश मार्केटजवळील लिंबाच्या झाडाजवळ एमडी (मेफेड्रोन) सदृष्य पावडर विकण्यासाठी येणार आहे.

गुरुवारी पोलीस निरीक्षक बागवडे यांनी लगेचच सहकारी पोलीस उपनिरीक्षक अमोल म्हस्के, पोलीस अंमलदार पठाण, जाधव, धर्मे, त्रिभुवन यांच्यासह छाप्याचे नियोजन केले. द्वारकेश मार्केटजवळ सापळा लावून पथक थांबले. रात्री साडेनऊला संशयित शेख अजहर शेख इस्माईल येताच त्‍याच्यावर झडप घालून ताब्‍यात घेतले. त्याच्या पँटच्या खिशात प्लास्टिकची पिशवी मिळाली. पिशवीत  पांढऱ्या रंगाची पावडर असलेल्या छोट्या छोट्या पॅकींगच्या पुड्या दिसून आल्या. एकूण १५ पुड्या होत्‍या. त्‍या मेफेड्रोन ड्रग्जच्या होत्‍या. त्‍यांचे वजन १५.७८ ग्रॅम भरले. त्‍यांची किंमत आहे ९५ हजार रुपयांचे हे ड्रग्‍ज पोलिसांनी जप्त केले.

अजहरच्या चौकशीत धक्कादायक खुलासे
पोलीस निरीक्षक गीता बागवडे यांनी शेख अजहरची कसून चौकशी केली असता त्‍याने आलीम शेख ऊर्फ गुड्डू शेख (रा. चिकलठाणा) याच्याकडून ड्रग्‍ज आणल्याचे सांगितले. आलीम हा टॉवर उभारण्याचे काम करत असल्याचे सांगत पवनेल, मुंबईला जाऊन ७ दिवसांना १०० ग्रॅम ड्रग्ज आणून शहरात विकतो. अजहरसारखे जवळपास ६ एजंट जिन्सी, बायजीपुऱ्यात त्याच्यासाठी काम करत असल्याचा संशय पोलिसांना आहे. त्‍यांचे मुख्य ग्राहक गुन्हेगार, रिक्षाचालक असून, अडीच हजार रुपयांत १ ग्रॅम पावडर विकली जाते. गुटखा व अन्य सुगंधी तंबाखूत थोडी थोडी टाकून नशा केली जात असल्याचा धक्कादायक खुलासाही चौकशीतून झाला. आलीमचा शोध पोलीस घेत असून, त्‍याला पकडल्यानंतरच अन्य एजंट आणि रॅकेटची पाळेमुळे खोदून काढण्यात पोलिसांना यश येणार आहे.