पोलिसांना पाहून पळणाऱ्याकडे आढळली गावठी बंदूक!, वाळूज एमआयडीसी पोलिसांची कामगिरी, साथीदार फरारी

छत्रपती संभाजीनगर (मेट्रोपोलिस पोस्ट वृत्तसेवा) : वाळूज एमआयडीसीतील इंद्रप्रस्थ कॉलनीत पोलिसांनी एका युवकाला पकडून त्याच्याकडून गावठी कट्टा जप्त केला आहे. त्याचा साथीदार फरारी झाला आहे. ही कारवाई सोमवारी (१ डिसेंबर) रात्री ९ च्या सुमारास करण्यात आली.

योगेश लक्ष्मण गिराम (वय ३१, रा. शिक्षकनगर शिवनेरी कॉलनी रांजणगाव शेणपुंजी) असे पकडण्यात आलेल्याचे नाव असून, त्याचा साथीदार सचिन भुजंगराव मिसाळ (रा. ओमसाईनगर, रांजणगाव शेणपुंजी) हा फरारी झाला आहे. पोलीस अंमलदार सुरेश भिसे यांनी या प्रकरणात तक्रार दिली आहे. ते विशेष पथकात कार्यरत आहेत. पोलीस ठाण्याच्या हद्दीत अवैध धंद्यांवर कारवाईसाठी पोलीस उपनिरीक्षक सागर पाटील, पोलीस अंमलदार सुरेश भिसे, राजाराम वाघ, समाधान पाटील हे गस्त घालत होते.

रात्री ९ ला इंद्रप्रस्थ कॉलनीजवळ आकार टुल्स चौकात आले असता श्रीराम संस्थान कमान इंद्रप्रस्थ कॉलनीकडे जाणाऱ्या रोडच्या बाजूला दोन युवक संशयास्पदरित्या उभे दिसले. पोलिसांनी त्यांच्याकडे धाव घेतली असता ते अंधाराचा फायदा घेऊन पळू लागले. त्यातील एकाला पोलिसांनी पकडले. त्याचे नाव विचारले असता त्याने योगेश गिराम सांगितले. त्याच्यासोबत असलेल्याचे नाव सचिन मिसाळ असल्याचे सांगितले. पोलिसांनी त्याची झडती घेतली असता जिन्स पँन्टच्या पुढील डाव्या खिशात १५ हजार रुपयांचा गावठी कट्टा मिळून आला. तो पोलिसांनी जप्त केला. योगेशविरुद्ध गुन्हा दाखल करून त्याला अटक करण्यात आली. त्याच्या साथीदाराचा शोध घेतला जात आहे. अधिक तपास पोलीस निरीक्षक रामेश्वर गाडे करत आहेत.