एमजीएम कॉलेजमधील विद्यार्थी निवडणुकीवरून चालला चाकू, १ विद्यार्थी गंभीर जखमी

छत्रपती संभाजीनगर (मेट्रोपोलिस पोस्ट वृत्तसेवा) : एमजीएम महाविद्यालयातील विद्यार्थी निवडणुकीवरून विद्यार्थ्यांच्या दोन गटांत वाद उफाळून आला. यात एका गटाने दुसऱ्या उमेदवाराच्या समर्थकाला चाकूने वार करून गंभीर जखमी केले. ही घटना जालना रोडवरील नैवेद्य हॉटेलसमोर शुक्रवारी (६ मार्च) सायंकाळी सहाच्या सुमारास घडली. या प्रकरणात सिडको पोलिसांनी ६ विद्यार्थ्यांविरुद्ध गुन्हा दाखल केला आहे.

ओमकार बद्रीनाथ क्षीरसागर (वय १८, रा. संत सेना चौक, चिकलठाणा) याचा जबाब पोलिसांनी नोंदवला आहे. त्याच्यावर सध्या सह्याद्री हॉस्पिटलमध्ये उपचार सुरू आहेत. तो एमजीएम महाविद्यालयात बीबीएच्या प्रथम वर्षात शिक्षण घेतो. महाविद्यालयात वेगवेगळ्या विभागांच्या विद्यार्थी अध्यक्षपदाच्या निवडणूक चालू होत्या. त्यापैकी काही विभागांची निवडणूक शुक्रवारी (६ मार्च) तर काही विभागांची निवडणूक शनिवारी (७ मार्च) होती. ओमकार हा त्याच्या आयओएमआर विभागाचा उमेदवार मित्र आयुष राहुल सावंत (बीबीए द्वितीय वर्ष) याचा प्रचार करत होता.

तो आयुषचा सूचकही होता. शुक्रवारी  कृष्णा मानकापे याने आयुषच्या पॅनलमध्ये असलेल्या निखिल संतोष दानवे याला कॉल केला. ओमकार व आयुषला जालना रोडवरील नैवेद्य हॉटेलसमोर बोलावून घेतले. तिथे दोघे गेल्यानंतर, ‘तुम्ही आमच्या विरोधात शिवतेज जावळे व राज बनसोडे यांना उमेदवारी का दिली होती’, असे म्हणून कृष्णाने त्यांना शिवीगाळ करण्यास सुरुवात केली.

आता आम्ही त्या दोघांना मॅनेज केले आहे, असे सांगत कृष्णा मानकापे याने साथीदार विनितसिंग राजपूत, कृष्णा माने, संस्कार वाघमारे, यश राजपूत, विशाल शेळके व एक काळा शर्ट घातलेला व शेंडी असलेला व्यक्ती यांच्यासोबत मिळून ओमकार व आयुष यांना हाताचापटाने मारहाण सुरू केली. विनीतसिंग राजपूत याने ओमकारच्या डोक्यात चाकू मारला. काळा शर्ट घातलेल्याने चाकूच्या मुठीने ओमकारच्या ओठावर मारले. यात ओमकार जखमी झाला. ओमकारचे मित्र आयुष सावंत, निखिल दानवे, करण थोरात, आदित्य शिंदे यांनी मध्यस्थी करून ओमकारला वाचवले व सह्याद्री हॉस्पिटलमध्ये दाखल केले. अधिक तपास सहायक पोलीस उपनिरीक्षक भिवसन तुपे करत आहेत.