Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) : शहरात मोकाट कुत्र्यांनी अक्षरशः धुमाकूळ घातला असून, एकट्या दुकट्या महिला, मुलांवर ते हल्ले चढवत आहेत. कुत्र्यांच्या हल्ल्याच्या घटना वाढत असूनही, महापालिकेचा संबंधित विभाग झोपा काढतो का, असा प्रश्न निर्माण झाला आहे. बायजीपुऱ्यातील कुरैशी हॉलजवळ खेळणाऱ्या एका चिमुकल्याचे मोकाट कुत्र्याने लचके तोडल्याचा अंगावर शहारे आणणारा व्हिडीओ समोर आल्यानंतर महापालिकेच्या हलगर्जीपणाबद्दल संताप व्यक्त होत आहे. यात चिमुकला गंभीर जखमी झाला आहे.
नागरिकांच्या माहितीनुसार, शनिवारी (१४ फेब्रुवारी) दुपारी अडीचच्या सुमारास दोन-तीन लहान मुले गल्लीत खेळत होते. अचानक मोकाट कुत्र्यांची झुंड तिथे आली. त्यातील एका कुत्र्याने चिमुकल्याचे थेट लचके तोडायला सुरुवात केली. चिमुकला आक्रोश करत होता, पण कुत्रा आणखी त्वेषाने हल्ला चढवत होता. हा व्हिडीओ पाहताना मोकाट कुत्र्यांच्या प्रश्नावर संतापाची लाट उसळली आहे. स्वतःची पाठ थोपटून घेणाऱ्या आयुक्तांनी मोकाट कुत्र्यांचा प्रश्न गांभीर्याने घेत सोडवावा, अधिकाऱ्यांना कामाला लावावे, अशी मागणी होत आहे. मुलाच्या शरीरावर अनेक ठिकाणी गंभीर जखमा झाल्या आहेत. सध्या त्याच्यावर खासगी रुग्णालयात उपचार सुरू आहेत. त्याची प्रकृती चिंताजनक आहे. ही घटना तिथल्याच एका सीसीटीव्ही कॅमेऱ्यात कैद झाली आहे. नागरिकांमध्ये भीतीचे वातावरण आहे.
