दर्शन घेऊन मंदिराबाहेर पडताच काळाने घातला घाला!; स्कुटीच्या धडकेने वृद्धाचा मृत्‍यू, हर्सूलची घटना

By City News Desk

On 16 Feb 2026

दर्शन घेऊन मंदिराबाहेर पडताच काळाने घातला घाला!; स्कुटीच्या धडकेने वृद्धाचा मृत्‍यू, हर्सूलची घटना

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : दर्शन घेऊन मंदिरातून बाहेर पडताच वृद्धाला स्कुटीस्वाराने उडवले. यात वृद्धाचा मृत्‍यू झाला. ही घटना बुधवारी (११ फेब्रुवारी) सकाळी १० च्या सुमारास हर्सूल येथील तुळजाभवानी मंदिरासमोर घडली.

नारायण इंदरसिंग चंदनसे (वय ४४, रा. आईसाहेबनगर, हर्सूल) यांनी याप्रकरणात तक्रार दिली आहे. ते फरशी बसविण्याचे काम करतात. त्यांचे वडील इंदरसिंग नामदेव चंदनसे (वय ७०) ११ फेब्रुवारीला सकाळी साडेनऊच्या सुमारास स्‍नान करून दर्शनासाठी नायरा पेट्रोलपंपाजवळील तुळजा भवानी मंदिरात गेले. पायी परत घरी येत असताना सकाळी १० ला मंदिरासमोरच ॲक्टिवा स्कुटीने (क्र. एमएच २० जीए ६५७८) त्यांना धडक दिली. यात इंदरसिंग हे गंभीर जखमी झाले.

त्यांना नागरिकांनी एम्स हॉस्पिटलमध्ये दाखल केले असता, उपचारादरम्‍यान दुपारी २ वाजून १० मिनिटांनी त्यांचा मृत्‍यू झाला. स्कुटीचालकाचे नाव राहुल मोतीराज ढगे (वय २५, रा. भारज बुद्रूक, ता. जाफराबाद, जि. जालना, ह. मु. रुख्मिनी मेडिकलजवळ, पिसादेवी रोडजवळ) असे असल्याचे नारायण चंदनसे यांना कळले. त्यांनी हर्सूल पोलीस ठाण्यात शनिवारी (१४ फेब्रुवारी) तक्रार दिली. त्यावरून पोलिसांनी राहुल ढगे याच्याविरुद्ध गुन्हा दाखल केला आहे. अधिक तपास पोलीस उपनिरीक्षक सचिन पागोटे करत आहेत.