Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post
छत्रपती संभाजीनगर (मेट्रोपोलिस पोस्ट वृत्तसेवा) :शहरातील अंमली पदार्थाचे रॅकेट चालवणाऱ्या तस्करांना प्रशासन चांगलाच दणका देण्याच्या विचारात आहे. ड्रग्ज तस्करांच्या थकीत पाणीपट्टी व बेकायदा बांधकामावर थेट योगी स्टाईल कारवाई करत बुलडोझर चालवण्यासाठी ६० गुन्हेगारांची यादीच पोलिसांनी सोमवारी (१६ फेब्रुवारी) मनपाला पाठवली. या यादीची पडताळणी करून आठ दिवसांतच पोलिस बंदोबस्तात कारवाई करत त्यांच्या मालमत्ता जमीनदोस्त केल्या जाणार आहेत.
सूत्रांनुसार, पोलीस आयुक्त प्रवीण पवार, पोलीस उपायुक्त रत्नाकर नवले यांनी गेल्या वीस दिवसांपासून विविध प्रकारच्या ड्रग्जच्या पेडलर्स, स्मगलर्सचे जाळे उद्ध्वस्त करण्याची मोहीमच हाती घेतली आहे. २५ जानेवारीला पहिल्या कारवाईनंतर ७ फेब्रुवारीपर्यंत पोलीस निरीक्षक गजानन कल्याणकर व त्यांच्या पथकाने १६ जणांना अटक करत १३ लाखांचे अमली पदार्थ जप्त केले. या रॅकेटचा मुख्य सूत्रधार अशफाक पटेल पसार आहे. त्याच्या सख्ख्या भावासह त्याच्या अन्य १५ साथीदार पोलिसांच्या हाती लागले. अन्य तस्करांची नावे समोर आली आहे. त्या अनुषंगाने अशा नामचिन गुंडांवर कठोर कारवाई करण्याचा निर्णय पोलीस प्रशासनाने घेतला आहे.
या अनुषंगाने पोलीस आयुक्त प्रवीण पवार यांनी मनपा आयुक्त जी. श्रीकांत यांना सोमवारी कारवाईबाबत पत्र पाठवले. त्यात ६० रेकॉर्डवरील गुन्हेगार, अमली पदार्थाच्या तस्करांचे नाव, राहत असलेले घर तसेच अन्य मालमत्तांची माहिती दिली. सदर सर्व मालमत्ता अमली पदार्थ विक्री करण्यासाठी वापरत असून ते अनधिकृत असल्याचा संशय आहे. या घरांमुळे कायदा सुव्यवस्थेचा प्रश्न निर्माण होत असून उच्च न्यायालयाचे आदेश व मनपाची प्रक्रिया पूर्ण करून बांधकामे निष्कासित करावे. या कारवाईसाठी योग्य पोलिस बंदोबस्त पुरवण्याचे आश्वासन पत्रात देण्यात आले आहे.
अनेक कुख्यात मंडळींचा यात समावेश ६० जणांच्या यादीत प्रामुख्याने मुख्य तस्कर शेख अशफाक शेख इसाक पटेल (रा. रवींद्रनगर व शहाबाजार, चंपाचौक), ज्ञानेश्वर उर्फ माऊली मनोहर यादव (रा. गल्ली क्र. १४, जयभवानीनगर), सय्यद फैजल उर्फ तेजा (रा. किलेअर्क), अजय व राणी ठाकूर (रा. सातारा गाव), अनिल अंबादास साळवे (रा. सावित्रीनगर, चिकलठाणा), आदिल बिन हमद बिन चाऊस (रा. काचीवाडा, शहाबाजार), विश्वनाथ उर्फ कोल्ह्या पिंपळे (रा. गल्ली क्र. १५, संजयनगर), विशाल छगन तामचीकर (रा. नारेगाव) यांचा समावेश आहे.
