शहर पोलीस दलात खळबळ : आरोपी न करण्यासाठी मागितले १४ लाख!; व्हिडीओ व्हायरल, बेगमपुऱ्याचा अंमलदार गायकवाड निलंबित, PI जगताप यांची नियंत्रण कक्षात उचलबांगडी!!

By City News Desk

On 15 Feb 2026

शहर पोलीस दलात खळबळ : आरोपी न करण्यासाठी मागितले १४ लाख!; व्हिडीओ व्हायरल, बेगमपुऱ्याचा अंमलदार गायकवाड निलंबित, PI जगताप यांची नियंत्रण कक्षात उचलबांगडी!!

Copying of any text or photographs published on this website in whole or in part without the permission of 'Metropolis Post' newspaper is strictly prohibited. Please note that legal action will be taken if anyone is found doing so. - Editor, Metropolis Post

छत्रपती संभाजीनगर (मेट्रोपोलिस पोस्ट वृत्तसेवा) : बेगमपुरा पोलीस ठाण्याचा पोलीस अंमलदार गणेश गायकवाड याने वरिष्ठांच्या नावे तब्बल १४ लाख रुपयांची मागणी केली. या मागणीचा व्हिडीओ व्हायरल झाल्यानंतर शनिवारी (१४ फेब्रुवारी) त्याला तडकाफडकी निलंबित करण्यात आले, तर बेगमपुऱ्याचे पोलीस निरीक्षक मंगेश जगताप यांची नियंत्रण कक्षात बदली करण्यात आली आहे. शहर गुन्हे शाखेचे पोलीस उपायुक्त रत्नाकर नवले यांनी पत्रकारांना ही माहिती दिली. बुद्ध लेणी परिसरात सुरू असलेल्या अवैध उत्खनन प्रकरणात आरोपींच्या यादीतून नाव काढून कारवाई टाळण्यासाठी ही लाच मागण्यात आल्याचे सांगण्यात आले.

ऐतिहासिक बुद्ध लेणीलगत गौणखनिजाचे सर्रास अवैध उत्खनन केले जाते. मुरुमासाठी ब्लास्टिंग केले जाते. जेसीबी, पोकलेनने टेकड्या फोडल्या जात आहेत. यासंदर्भात वृत्तपत्रांत बातम्या आल्यानंतर न्यायालयाने कठोर कारवाई करून पोलिसांना अहवाल सादर करण्याचे निर्देश दिले होते. त्यानंतर महसूल अधिकारी दगडू जरारे यांच्या तक्रारीवरून बेगमपुरा पोलीस ठाण्यात अवैध उत्खनन प्रकरणी जीवनलाल डोंगरे, पृथ्वीराज डोंगरे, प्रेमराज डोंगरे, हंसराज डोंगरे यांच्याविरुद्ध गुन्हा दाखल करण्यात आला होता. पोलीस अंमलदार गायकवाडने यात काहींना आरोपी न करण्यासाठी १४ लाख रुपयांच्या लाचेची मागणी केली. एका कारमध्ये गायकवाड हा त्या व्यक्तींना पैशांची मागणी करत असल्याचा व्हिडीओ व्हायरल झाला. त्यामुळे वरिष्ठ पोलीस अधिकाऱ्यांनी गायकवाडला तडकाफडकी निलंबित केले, तर पोलीस निरीक्षक मंगेश जगताप यांची नियंत्रण कक्षात बदली केली आहे. अंतर्गत विभागीय चौकशी सहायक पोलीस आयुक्त सागर देशमुख करणार आहेत.