काळा गणपती मंदिर कार अपघात : चालक प्रशांत मगरची हर्सूल कारागृहात रवानगी

छत्रपती संभाजीनगर (सीएससीएन वृत्तसेवा) : सिडको एन १ मधील काळा गणपती मंदिरासमोर सुसाट कारने ६ जणांना उडवले होते. त्‍यातील एकाचा मृत्‍यू झाला होता. पोलिसांनी कारचालक प्रशांत एकनाथ मगर (वय ३१, रा. सिडको एन १) याला अटक केली होती. त्याला न्यायालयाने एक दिवसाची पोलीस कोठडी सुनावली होती. शनिवारी (५ जुलै) त्याची रवानगी हर्सूल कारागृहात करण्यात आली.

अपघातात जखमी झालेल्यांची प्रकृती आता स्थिर असल्याची माहिती पोलीस निरीक्षक गजानन कल्याणकर यांनी दिली. काळा गणपती मंदिरासमोरील सर्व्हिस रोडवर ४ जुलैला सकाळी साडेनऊच्या सुमारास भरधाव स्विफ्ट डिझायर कारने (एमएच २० एचएच ०७४६) सहा जणांना उडवले. यात मंदिराची १५ वर्षांपासून सेवा करणारे सुरक्षारक्षक गुणाजी लक्ष्मणराव शेवाळे (वय ७०, रा. विठ्ठलनगर, रामनगर) जागीच मृत्युमुखी पडले, तर ५ जण जखमी झाले होते. अपघातानंतर तासभरातच सिडको एमआयडीसी पोलिसांनी कारचालक प्रशांत मगरला अटक केली होती. त्‍याच्याविरुद्ध सदोष मनुष्यवधाचा गुन्हा दाखल करण्यात आलेला आहे.

प्रशांत नेहमीप्रमाणे सूतगिरणी चौकातील विभागीय क्रीडा संकुलातून टेनिस खेळून परतत पिरॅमिड चौकातून सर्व्हिस रोडवर सुसाट कार घेऊन निघाला होता. मंदिराच्या अलीकडे साकोळकर रुग्णालयासमोरील तीन दुचाकींना धडक दिली. तिथे न थांबता थेट मंदिराच्या पायऱ्यांपर्यंत सहा जणांना चिरडत गेला. ज्‍या कारने अपघात घडवला ती त्‍याने तीन महिन्यांपूर्वीच नवीन खरेदी केली होती. प्रशांत उच्‍चशिक्षित असून, सध्या स्पर्धा परीक्षांची तयारी करत होता. त्याने अभियांत्रिकीचे शिक्षण घेतलेले आहे. पोलिसांना त्‍याने माझ्याकडून ब्रेकऐवजी ॲक्‍सीलेटरवर पाय पडल्याने अपघात झाल्याचे सांगितले. कार ऑटोमेटिक असल्याने वेगात पुढे गेली, असे तो म्‍हणाला. मात्र पोलिसांनी त्‍याचा दावा खोडत तो आधीपासूनच भरधाव होता, असे सांगितले होते.