इम्‍तियाज जलील यांची भीम आर्मीला साद!, ‘वंचित’शी दोस्ती तुटल्यानंतर आता नवा मित्र शोधण्यासाठी प्रयत्‍न!!

By City News Desk

On 08 Jul 2025

इम्‍तियाज जलील यांची भीम आर्मीला साद!, ‘वंचित’शी दोस्ती तुटल्यानंतर आता नवा मित्र शोधण्यासाठी प्रयत्‍न!!

छत्रपती संभाजीनगर (सीएससीएन वृत्तसेवा) : वंचित बहुजन आघाडी आणि एमआयएमच्या युतीमुळे आ. इम्‍तियाज जलील हे विधानसभा, लोकसभा निवडणुका जिंकले. मात्र प्रकाश आंबेडकर यांचा पराभव झाला. त्यानंतर ही युती तुटली. नंतर २०२४ च्या लोकसभा, विधानसभा निवडणुकीत माजी खासदार इम्तियाज जलील यांचाही पराभव झाला. वंचित बहुजन आघाडीसारखा पर्याय शोधण्यासाठी आता एमआयएमने प्रयत्‍न सुरू केले असून, यासाठी त्‍यांनी […]

छत्रपती संभाजीनगर (सीएससीएन वृत्तसेवा) : वंचित बहुजन आघाडी आणि एमआयएमच्या युतीमुळे आ. इम्‍तियाज जलील हे विधानसभा, लोकसभा निवडणुका जिंकले. मात्र प्रकाश आंबेडकर यांचा पराभव झाला. त्यानंतर ही युती तुटली. नंतर २०२४ च्या लोकसभा, विधानसभा निवडणुकीत माजी खासदार इम्तियाज जलील यांचाही पराभव झाला. वंचित बहुजन आघाडीसारखा पर्याय शोधण्यासाठी आता एमआयएमने प्रयत्‍न सुरू केले असून, यासाठी त्‍यांनी भीम आर्मीचे चंद्रशेखर आझाद यांना साद घातली आहे. भीम आर्मीशी प्राथमिक टप्यातील बोलणी झाली असून, या पक्षाचे गौरीप्रसाद उपासक यांच्याशी छत्रपती संभाजीनगरमध्ये बैठक घेतल्याची माहिती एमआयएमचे प्रदेशाध्यक्ष इम्तियाज जलील यांनी पत्रकारांशी बोलताना दिली. त्‍यामुळे आगामी काळात, अगदी महापालिकेच्या निवडणुकीत एमआयएम आणि भीम आर्मी एकत्र येण्याची शक्‍यता नाकारता येत नाही.

इम्‍तियाज जलील यांनी माहिती दिली, की बहुजनांमध्ये भीम आर्मीचे चंद्रशेखर आझाद यांना मानणारा मोठा आहे. त्यांचा प्रभावही आहे. भीम आर्मीसोबत युतीबद्दल सध्या केवळ प्राथमिक चर्चा सुरू आहे. तेही आमच्याशी युती करण्यास उत्‍सुक असल्याचे जलील म्हणाले. अलीकडच्या काळात जलील यांच्यावर आंबेडकरी समाज नाराज असल्याची चर्चा असून, काही दिवसांपूर्वी त्‍यांनी मंत्री संजय शिरसाट यांच्यावर जमीन घोटाळ्याचे आरोप करताना अनुसूचित जाती समाजाबद्दल आक्षेपार्ह शब्‍द वापरला होता. त्‍यानंतर त्‍यांच्याविरुद्ध आंबेडकरी समाजाने शहरात मोर्चाही काढला होता. त्‍यावरून रणकंदन सुरू असताना भीम आर्मीचे चंद्रशेखर आझाद जलील यांना किती प्रतिसाद देतात, हे पाहणे औत्‍स्‍युक्‍याचे ठरणार आहे.