यवतमाळ हादरले!‌  मैत्रिणीसोबत यात्रोत्सवात आलेल्या १४ वर्षीय मुलीवर पाशवी लैंगिक अत्याचार!!

यवतमाळ (मेट्रोपोलिस पोस्ट वृत्तपत्राच्या सौजन्याने) : यवतमाळ जिल्ह्यातील मारेगाव तालुक्यातील प्रसिद्ध पांढरदेवी यात्रोत्सवात मैत्रिणीसोबत आलेल्या १४ वर्षीय मुलीला बळजबरीने जंगलात ओढत नेत तिच्यावर पाशवी लैंगिक अत्याचार करण्यात आला. ही संतापजनक घटना बुधवारी (२२ ऑक्टोबर) दुपारी ४ वाजता पांडवदेवी (ता. मारेगाव) परिसरात घडली. नराधम कैलास सूर्यभान आत्राम (वय २८, रा. आवळगाव, ता. मारेगाव) याला पोलिसांनी अवघ्या काही तासांत अटक केली.

पांढरदेवी येथे गायगोधन उत्सवानिमित्त यात्रा भरते. बुधवारी यात्रेत मोठी गर्दी उसळली होती. पांढरदेवी मंदिरापासून काही अंतरावर असलेल्या एका गावातील १४ वर्षीय मुलगी उत्सव पाहण्यासाठी गावातील तीन मैत्रिणींसह आली होती. उत्सव पाहत असताना गर्दी खूप असल्याने चार मैत्रिणींची ताटातूट झाली. पीडित मुलगी मैत्रिणींचा शोध घेत असताना कैलासची नजर तिच्यावर पडली. त्याने तिला गर्दीपासून दूर नेले. नंतर धमकी देत बळजबरीने तोंड दाबून ओढत जंगलात नेले. तेथे तिच्यावर पाशवी लैंगिक अत्याचार केला.

त्याच्या ताब्यातून कसाबसा पळ काढल्यानंतरही नराधमाने तिचा काही अंतरावर पाठलाग केला. नंतर तो जंगलात पळून गेला. मुलीने काकाला घडलेला प्रकार सांगितला. त्यानंतर मुलीच्या आई- वडिलांनी मुलीसह मारेगाव पोलीस ठाणे गाठून तक्रार दाखल केली. नराधम कैलास दारूडा असून, तो दारू पिण्यासाठी मुलीच्या गावात जात होता. यातून त्याची मुलीसोबत तोंडओळख होती. मात्र, मुलीला त्याचे नाव माहीत नसल्याने त्याला शोधणे पोलिसांना अवघड झाले होते. मुलीने केलेल्या वर्णनावरून अवघ्या दोन तासांत पोलिसांनी संशयित दोघांना पकडून अटक केली. त्यांना मुलीसमोर उभे केले असता मुलीने नराधमाला ओळखले.