मुंबईत काचेच्या उंच इमारतीला भीषण आग!; सुदैवाने २७ जण बचावले, १७ जण होरपळले!! 

मुंबई (मेट्रोपोलिस पोस्ट वृत्तपत्राच्या सौजन्याने) : मुंबईतील जोगेश्वरीच्या ब्रह्मपाडा परिसराने गुरुवारी (२३ ऑक्‍टोबर) मोठ्या आगीचा थरार अनुभवला. एस.व्ही. रोडवरील जे.एन.एस बिझनेस सेंटर या उंच काचेच्या इमारतीत आग लागली आणि एकच धावाधाव झाली. क्षणार्धात नवव्या मजल्यापासून तेराव्या मजल्यापर्यंत वाढलेल्या या आगीमुळे धुराचे प्रचंड लोट उसळले. अग्निशमन दलाने तब्बल चार तासांचा लढा देऊन ही आग विझवली. नशीब बलवत्तर होते म्हणून २७ जण या आगीतून बचावले तर धुरामुळे श्वसनाचा त्रास होऊ लागल्याने १७ जण रुग्णालयात उपचार घेत आहेत.

मुंबई महापालिकेच्या आपत्कालीन कक्षाने दिलेल्या माहितीनुसार, गुरुवारी सकाळी १०: ४१ वाजता जे.एन.एस. बिझनेस सेंटरच्या नवव्या मजल्यावर शॉर्ट सर्किटमुळे आग लागली. ही संपूर्ण इमारत काचेची असल्याने आणि त्यातून बाहेर पडण्यासाठी जागाच नसल्याने आग काही मिनिटांतच तेराव्या मजल्यापर्यंत पोहोचली. आग लागली त्यावेळी शेकडो लोक दिवाळीच्या खरेदीच्या निमित्ताने या बिझनेस सेंटरमध्ये आलेले होते. आग लागल्यावर हे सगळे जण आत अडकून पडले. आगीचा वेग इतका होता की अवघ्या काही मिनिटांत या इमारतीत असलेल्या विविध व्यावसायिक कार्यालयातील वायरिंग, डक्ट, प्रकल्प फॉल सिलिंग, फर्निचर, कागदपत्रे, कॉम्प्युटर आदी  काही क्षणांतच खाक झाले. आगीचा प्रभाव वाढत असल्याचे पाहून काही जणांनी तत्काळ अग्निशमन दलाशी संपर्क साधला.

काही वेळातच अग्निशमन दलाचे जवान घटनास्थळी दाखल झाले. आगीची तीव्रता पाहून अग्निशमन दलाने ही आग लेव्हल तीनची असल्याचे जाहीर केले होते. आग रौद्ररूप धारण करीत असल्याने बेस्ट प्रशासनाला या परिसरातील बस वाहतूक वळवावी लागली होती. अग्निशमन दलाच्या जवानांनी अत्यंत कठोर परिश्रम घेऊन ही आग विझवण्यासाठी त्यांना तब्बल चार तास लागले. तोपर्यंत अनेक महिला आणि पुरुष या बिझनेस सेंटरमध्ये आगीत अडकून पडले होते. अखेर अग्निशमन दलाच्या जवानांनी शिड्या आणि हायड्रोलिक प्लॅटफॉर्म लॅडरचा वापर करून दोन महिलांसह एकूण २७ जणांना सुरक्षित बाहेर काढण्यात यश मिळवले. यातील १७ जणांवर अद्यापही जोगेश्वरीच्या हिंदुहृदयसम्राट बाळासाहेब ठाकरे रुग्णालयात उपचार सुरू आहेत.