छत्रपती संभाजीनगरच्या सुवर्णबाजारात सोन्याच्या दागिन्यांपेक्षा यंदा नाण्यांचाच खणखणाट!; दरात सहा हजारांची घट, आणखी काही दिवस सोन्याचा दर स्थिर राहणार...

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : गेल्यावर्षीपेक्षा यंदा सोन्याला दुप्पट भाव होता. तरीही सोन्याच्या खरेदीवर फारसा परिणाम झाला नसल्याचे दिवाळीत दिसून आले. छत्रपती संभाजीनगरच्या सुवर्ण बाजारपेठेत सोन्याच्या दागिन्यांऐवजी बिस्किटे आणि नाण्याच्या खरेदीकडे ग्राहकांचा कल होता. यामुळे या वेळी दिवाळीच्या चार दिवसांत सोन्याच्या नाण्यांच्या खरेदी- विक्रीत कोट्यवधी रुपयांची उलाढाल झाली.

आजवर हौसेने सोन्याची खरेदी करण्याकडे ग्राहकांचा कल असायचा. मात्र, गेल्या काही वर्षांपासून सोन्याचा दर सातत्याने चढा असून, त्यामुळे आता ग्राहक सोने खरेदीकडे हौस म्हणून नव्हे तर गुंतवणूक म्हणून पाहत असल्याचे व्यापाऱ्यांचे निरीक्षण सांगते.  दरम्यान, गतवर्षी दिवाळीला ६० ते ७० हजार रुपये तोळा या दराने विक्री झालेल्या सोन्याचा दर या दिवाळीला दुप्पट म्हणजे एक लाख ३० हजारांच्या घरात होता. त्याचा परिणाम साहजिकच सोन्याच्या खरेदी- विक्रीवर झाला. छत्रपती संभाजीनगरच्या एका प्रख्यात ज्वेलर्सच्या माहितीनुसार, यंदा देशभरात दिवाळीच्या काळात १२५ टन सोन्याच्या विक्रीतून सुमारे ९६ हजार कोटींची उलाढाल झाल्याचा अंदाज आहे.

असे असले तरी गेल्या काही वर्षांच्या तुलनेत यंदा सोन्याच्या दागिन्यांना कमी मागणी होती. त्या तुलनेत सोन्याची नाणी आणि बिस्किटांची मागणी यंदा वाढलेली होती. विशेषत: धनत्रयोदशी आणि लक्ष्मीपूजन या दोन दिवसात सोने-चांदीच्या नाण्याच्या खरेदीवर ग्राहकांचा अधिक भर होता. दिवाळीच्या कालावधीत सोन्याच्या दरात सहा हजार रुपयांची घट झाली असून, आणखी काही दिवस सोन्याचा दर स्थिर राहील. मात्र, काही दिवसांनी लग्नसराई सुरू झाल्यावर पुन्हा सोन्याच्या दरात वाढ होईल, असा दावा एका ज्वेलर्सने व्यक्त केला आहे.