वाळूजमध्ये २०० रुपयांच्या लाइट बिलासाठी भाडेकरूचे डोके फोडले!; घरमालकाविरुद्ध गुन्हा दाखल

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : वाळूज येथे घरभाडे दिल्यानंतर लाइट बिलाचे २०० रुपये उद्या देतो, असे सांगणाऱ्या भाडेकरूला घरमालकाने साथीदारासह मिळून बेदम मारहाण करत त्याचे डोके फोडले. यात भाडेकरू जखमी झाला. वाळूज पोलिसांनी घरमालकाविरुद्ध गुन्हा दाखल केला आहे.

ट्रकचालक नितीन प‌द्माकर जगदाळे (वय ३४, रा. भारतनगर वाळूज, बबन भालेराव यांच्या घरात किरायाने) हे पत्नी, दोन मुलांसह राहतात. शनिवारी (१८ ऑक्‍टोबर) वाळूज पोलीस ठाण्यात त्यांनी दिलेल्या तक्रारीनुसार, १७ ऑक्‍टोबरला रात्री साडेआठच्या सुमारास ते घरी असताना घरमालक बबन भालेराव व सतिश भालेराव हे भाडे मागण्यासाठी आले. जगदाळे यांनी त्यांना अडीच हजार रुपये रूमभाडे दिले व लाईट बील २०० रुपये सकाळी देतो, असे सांगितले. त्यावर सतिश भालेराव म्हणाला की, मला पैसे आताच दे.

त्यावर जगदाळे हे त्याला समजावून सांगत असताना तो शिवीगाळ करू लागला. त्याने त्याचा मित्र अमोल बोरुडे याला बोलावून घेतले. अमोलने लाथाबुक्क्यांनी मारहाण केली. सतिश भालेराव याने त्याच्या हातातील कडे डोक्यात मारून जखमी केले. जगदाळे यांना पत्नी सरला यांनी छत्रपती संभाजीनगरच्या घाटी रुग्णालयात दाखल केले. उपचार घेतल्यानंतर जगदाळे यांनी वाळूज पोलीस ठाण्यात तक्रार दिली. त्यावरून पोलिसांनी अमोल बोरुडे व सतिश भालेराव या दोघांविरुद्ध गुन्हा दाखल केला आहे. अधिक तपास पोलीस अंमलदार बबन शिंदे करत आहेत.