ज्युलियानाचा १० वर्षीय मुलीच्या जीवाशी खेळ; वर्षभर बालमजूर म्हणून राबवले; पुढे तर हद्दच केली...

पालघर (मेट्रोपोलिस पोस्ट वृत्तपत्राच्या सौजन्याने) : पालघर जिल्ह्याच्या वाडा तालुक्यात बालमजुरीचा धक्कादायक प्रकार श्रमजीवी संघटनेने समोर आणला आहे. गौरापूर कातकरी वाडी येथील दहा वर्षीय आदिवासी कातकरी मुलीला उत्तन येथे जबरदस्तीने बालमजूर म्हणून राबवत तिच्याकडून घरोघरी काम करून घेतल्याच्या या घटनेत आता वाडा पोलीस ठाण्यात गुन्हा दाखल झाला आहे.

या संदर्भात मुलीच्या आईने श्रमजीवी संघटनेच्या साह्याने पोलिसांत तक्रार नोंदवली होती. ज्युलियाना लेजली पाटील (उत्तन चौक, भाईंदर वेस्ट, ठाणे) असे गुन्हा दाखल झालेल्या महिलेचे नाव आहे. या तक्रारीनुसार, ज्युलियाना गेल्या वर्षी गणपतीच्या काळात या दहा वर्षीय मुलीला जबरदस्तीने घरकाम व इतर कामांसाठी घेऊन गेली. विशेष म्हणजे या मुलीकडून करून घेण्यात येणाऱ्या कामाच्या बदल्यात ज्युलियानाने त्या मुलीच्या कुटुंबीयांना पाच ते सहा हजार रुपये आगाऊ रक्कम म्हणून दिली होती. ज्युलियानाने यंदा जून महिन्यापर्यंत त्या मुलीकडून तिच्या इच्छेविरुद्ध विविध कामे करून घेतली.

पुन्हा २२ ऑक्टोबर रोजी दिवाळीच्या पाडव्याच्या दिवशी ज्युलियाना त्या मुलीच्या घरी आली आणि पुन्हा तिला कामावर येण्यासाठी बळजबरी करू लागली. यावेळी संधी साधून मुलीच्या आईने श्रमजीवी संघटनेच्या पदाधिकाऱ्यांशी संपर्क साधला. यानंतर श्रमजीवी संघटनेच्या जिल्हाप्रमुख रेखा पऱ्हाड, तालुकाध्यक्ष भरत जाधव, सचिव सुरज दळवी, आदेश वाघ, नामदेव पवार, नेत्रा मांजे, चेतना पवार आदींनी मुलीच्या आईसह थेट वाडा पोलीस ठाणे गाठले. यानंतर ज्युलियाना विरोधात रितसर तक्रार नोंदवण्यात आली. या प्रकरणी आता पोलीस निरीक्षक दत्तात्रय किंद्रे यांच्या मार्गदर्शनाखाली पोलीस उपनिरीक्षक प्रभा राऊळ पुढील तपास करीत आहेत.