छत्रपती संभाजीनगरचे उदयोन्मुख नेमबाज संभाजी झनझन यांचा अपघाती मृत्यू!, क्रीडा क्षेत्रात हळहळ

छत्रपती संभाजीनगर (मेट्रोपोलिस पोस्ट वृत्तसेवा) : छत्रपती संभाजीनगर शहरातील उदयोन्मुख नेमबाज संभाजी झनझन (वय २७, रा. पारिजातनगर) यांचे सोमवारी (९ फेब्रुवारी) सकाळी १०:३० च्या सुमारास पालघर जिल्ह्यात अपघाती निधन झाले. ते महापालिकेतील निवृत्त अग्निशमन अधिकारी शिवाजी झनझन यांचे चिरंजीव होत. छत्रपती संभाजीनगरच्या क्रीडा क्षेत्रात हळहळ व्यक्त होत आहे.

राष्ट्रीय नेमबाजी स्पर्धेच्या सरावासाठी दोन मित्रांसह संभाजी हे पुण्याहून कारने अहमदाबादला जात होते. ते चालकाच्या शेजारील सीटवर बसलेले होते. सोमवारी सकाळी ७:३० वाजता मनोर (जि. पालघर) येथे दुसऱ्या चारचाकी वाहनाला त्यांची कार डाव्या बाजूने धडकली. यात गंभीर जखमी झालेल्या संभाजी यांना रुग्णालयात नेत असतानाच रस्त्यातच प्राणज्योत मालवली. त्यांचे दोन मित्रही गंभीर जखमी असून, त्यांच्यावर उपचार सुरू आहेत. दोन महिन्यांपूर्वीच संभाजी हे बालेवाडी, पुणे येथे क्रीडा कार्यकारी अधिकारी म्हणून नियुक्त झाले होते.

लहानपणापासूनच त्यांना नेमबाजीची प्रचंड आवड होती. २०११ ते २०२५ या काळात त्यांनी विविध स्पर्धा गाजवल्या. ७५ मेडल व प्रमाणपत्रे मिळविली होती. शिवाजी झनझन यांची मुलगी एमएस असून, तीही पुण्यातच राहते. घटनेची माहिती मिळताच मुलगी आणि त्यांचे भाऊ निवृत्त कृषी अधिकारी हरिश्चंद्र झनझन घटनास्थळी धावले. रात्री उशिरा संभाजी यांचे पार्थिव शहरात आणण्यात आले. त्यांच्यावर मंगळवारी आज, १० फेब्रुवारीला सकाळी ९ वाजता सिडको एन-६ सेंट्रल नाका येथील स्मशानभूमीत अंत्यसंस्कार करण्यात येणार आहेत.