धक्कादायक : जालन्याच्या निवासी क्रीडा संस्थेत मुलींचे लैंगिक शोषण; वासनांध व्यवस्थापक प्रमोद खरातला अटक

By City News Desk

On 29 Jul 2025

धक्कादायक : जालन्याच्या निवासी क्रीडा संस्थेत मुलींचे लैंगिक शोषण; वासनांध व्यवस्थापक प्रमोद खरातला अटक

जालना (सीएससीएन न्यूजडेस्क) : जालना येथे जिल्हा परिषदेतर्फे चालविण्यात येणाऱ्या निवासी क्रीडा संस्थेत संतापजनक प्रकार समोर आला आहे. या संस्थेत राहणाऱ्या अल्पवयीन मुलींचे व्यवस्थापक प्रमोद गुलाबराव खरात याने लैंगिक शोषण केल्याची तक्रार मुलींनी केली आहे. त्यांनी आधी पालकांना सांगितले, नंतर पालकांनी शनिवारी (२६ जुलै) जिल्हाधिकाऱ्यांची भेट घेऊन तक्रार केली. शिक्षण विभागातील अधिकाऱ्यांच्या चौकशीत मुलींनी खरातच्या गैरकृत्‍याचा पाढा वाचला. कदीम जालना पोलीस ठाण्यात खरात विरुद्ध रविवारी (२७ जुलै) रात्री गुन्हा दाखल करण्यात आला आहे.

निवासी क्रीडा संस्थेत २०१९ पासून खरात व्यवस्थापक आहे. या क्रीडा संस्थेतील मुला-मुलींनी आजवर राज्य आणि राष्ट्रीय पातळीवर जिल्ह्याचा लौकिक वाढवला आहे. मात्र संस्थेतील मुलींचे खरातने १ जून ते २४ जुलै या कालावधीत लैंगिक शोषण केले. तो मुलींना सीसीटीव्ही कॅमेरा नसलेल्या ठिकाणी नेऊन लैंगिक शोषण करायचा. शिक्षण विभागातील अधिकाऱ्यांनी आणि पोलीस अधिकाऱ्यांनी संस्थेला भेट दिल्यानंतर सुरुवातीला चार मुलींनी तक्रार करण्याचे धाडस दाखवले.

नंतर सात ते आठ मुलींनीही खरातच्या वासनांधतेचे कारनामे सांगितले. मुलींनी तक्रारी केल्यानंतर या प्रकरणात गटशिक्षणाधिकारी मनोज कोल्हे यांनी रविवारी कदीम जालना पोलीस ठाण्यात तक्रार दिली आहे. त्यावरून पोलिसांनी खरातविरुद्ध तक्रार दिली. तपास सहायक पोलीस निरीक्षक आरती जाधव करत आहेत. पोलिसांनी खरातला रविवारी रात्री अटक केली. त्याला सोमवारी (२८ जुलै) न्यायालयात हजर केले असता दोन दिवसांची पोलीस कोठडी सुनावण्यात आली आहे. या संस्थेत ३९ मुली शिक्षण घेतात.