जिहादी मानसिकतेच्या हल्लेखोरांविरुद्ध कठोर कारवाई होईल : मंत्री नितेश राणे यांची माहिती, छत्रपती संभाजीनगरात गंभीर जखमी गोरक्षकाची घेतली भेट 

छत्रपती संभाजीनगर (मेट्रोपोलिस पोस्ट वृत्तपत्राच्या सौजन्याने) : गोरक्षकावर काही जिहादी मानसिकतेच्या असामाजिक घटकांनी हल्ला केला. या हल्लेखोरांविरुद्ध कठोर कारवाई केली जाईल. संपूर्ण घटनाक्रमाची माहिती जाणून घेतली असून, ती मुख्यमंत्र्यांपर्यंत पोहोचवणार आहे, अशी माहिती मंत्री नितेश राणे यांनी छत्रपती संभाजीनगरात दिली.

नितेश राणे यांनी रविवारी (१२ ऑक्‍टोबर) खासगी रुग्णालयात उपचार घेत असलेल्या गोरक्षक गणेश आप्पासाहेब शेळके (वय २४, रा. पळशी, ता. छत्रपती संभाजीनगर) यांची भेट घेतली. डॉक्‍टरांकडून प्रकृती व उपचारासंबंधी माहिती घेतली. गणेश शेळके यांच्या पाठीशी ठामपणे उभा असल्याचे राणे म्हणाले. या वेळी उपस्थित गोवंश हत्या आणि मांस तस्करी करणाऱ्यांवर कारवाईसाठी पोलीस प्रशासन सहकार्य करत उपस्थितांनी सांगितले. शहराच्या विविध भागांत सरार्सपणे गोवंश कत्तल होत असल्याची तक्रार केली. राणे यांनी ही सर्व माहिती मुख्यमंत्री देवेंद्र फडणवीस यांच्यापुढे मांडणार असल्याचे सांगितले. यापूर्वी मंत्री अतुल सावे, हिंदुत्ववादी नेते मिलिंद एकबोटे यांनी गोरक्षक शेळके यांची भेट घेऊन प्रकृतीची विचारपूस केली.

काय आहे घटना...
चिकलठाण्यातील पुष्पक गार्डन परिसरात ७ ऑक्‍टोबरला सकाळी गोवंशाचे मांस पकडल्यानंतर तस्करांना पकडण्यासाठी गेलेल्या गोरक्षक गणेश शेळके, पोलीस अंमलदार अंकुश ढगे, महापालिकेचे स्वच्छता निरीक्षक सचिन शिंदे यांच्यावर जमावाने चाकू, कोयता, लोखंडी रॉड, लाठ्या काठ्यांनी प्राणघातक हल्ला केला. यात गणेश शेळके आणि सचिन शिंदे गंभीर जखमी झाले. अंकुश ढगे यांनाही जमावानेही धक्काबुक्की करत मारहाण केली होती. सध्या शेळके, शिंदे यांच्यावर खासगी रुग्णालयात उपचार सुरू आहेत. गणेश यांच्या जबाबावरून जमावाविरुद्ध हत्येचा प्रयत्न, मारहाण, दंगलीचा गुन्हा, पोलीस अंमलदार ढगे यांच्या तक्रारीवरून याच जमावावर सरकारी कामात हस्तक्षेप व मांस पकडल्याचा गुन्हा दाखल करण्यात आला आहे.

शहरात मोठे आंदोलन झाले, पण कारवाया नाममात्र...
छत्रपती संभाजीनगर शहरात गोवंशांची मोठ्या प्रमाणावर हत्‍या होत असताना कारवाया मात्र अगदी बोटावर मोजण्याइतक्या होतात. त्यात गोरक्षकावरील हल्ल्यामुळे हिंदुत्ववादी संघटना सध्या आक्रमक झाल्या आहेत. त्यांनी ८ ऑक्‍टोबरला क्रांतीचौकात तीव्र निदर्शने केली. त्यानंतर थेट चिकलठाणा गाठून हल्ला झालेल्या परिसरात घुसण्याचा प्रयत्न केला होता. त्यानंतर जनावरांसह रस्त्यावर ठिय्या दिला होता. गो मांस तस्करांवर मोक्का व कठोर कारवाई करू, मांसविक्री विरोधी स्वतंत्र पथक स्थापन करण्याचे आश्वासन पोलिसांनी दिले होते.