शहागंजमध्ये MIM ची दादागिरी; विरोधी पक्षनेता अब्दुल समीर यांच्यासह नगरसेवक, ४० कार्यकर्त्यांविरुद्ध गुन्हा दाखल

छत्रपती संभाजीनगर (मेट्रोपोलिस पोस्ट वृत्तसेवा) : शहागंजमध्ये रस्त्यावर लावण्यात येणाऱ्या हातगाड्यांमुळे होणारी वाहतूक कोंडी आणि त्यांच्याकडून होत असलेल्या अरेरावीमुळे शहरभर वातावरण संतप्त असताना, एमआयएमचे नगरसेवक, विरोधी पक्षनेते मात्र त्यांची बाजू घेण्यात धन्यता मानत आहेत. शुक्रवारी (२८ फेब्रुवारी) कारवाईसाठी गेलेल्या पथकाला धमकावत अधिकाऱ्यांना चक्क जीवे मारण्याच्या धमक्या देण्यात आल्याने सिटी चौक पोलिसांनी रविवारी (१ मार्च) रात्री मनपाचे विरोधी पक्षनेते अब्दुल समीर साजिद, नगरसेवक सय्यद उसामा अब्दुल कादीर, काकासाहेब काकडे, फेरोज खान मोईनउद्दीन खान, मेराज खान जलील खान, मोहम्मद वाजेद जहागीरदार, सोहेल कुरेशी, मोहम्मद वसीम अलीम अहेमद, मतीन पटेल, मुन्शी पटेल, नगरसेविकेचे पती सलीम सहारा, नगरसेविकेचे जावई साबेर, नगरसेविकेचे पती अकिल अहेमद आणि नगरसेविकेचे वडील अमजद चाचू यांच्यासह इतर ३० ते ४० कार्यकर्त्यांविरुद्ध गुन्हा दाखल करण्यात आला आहे.

महापालिका अतिक्रमण विभागाच्या उपायुक्त सविता सोनवणे यांनी या सर्वांविरुद्ध तक्रार दिली असून, तक्रारीत म्हटले आहे, की शुक्रवारी महापालिकेचे पथक कारवाई करत असताना एमआयएमचे १५ ते २० नगरसेवक समर्थकांसह घटनास्थळी आले. आरडाओरड, शिवीगाळ करत सरकारी कामात अडथळा निर्माण केला. जीवे मारण्याच्या धमक्या दिल्या. अब्दुल समीर म्हणाले, की वाहुळे साहब, जो भी तुम्हारा नाम है, नियम में रह के कारवाई करो, म्युनिसिपल कॉर्पोरेशन तुम्हारे बाप की जहाँगीर नहीं है, अगर महानगरपालिका वाले शहागंज मे दादागिरी करेंगे तो उनको शहागंज में घुसने नहीं दिया जाएगा, असे म्हणून हातगाडीवाल्यांना त्यांनी गोळा करून चिथावणी देत शिवीगाळ करून धमक्या दिल्या. महापालिका अधिकारी संजय सुरडकर यांना धमकावून शिवीगाळ करत जबरदस्तीने वाहनात बसवून हाकलून लावले. नगरसेवक सय्यद उसामा अब्दुल कादीर यांनी अतिक्रमण निरीक्षक रवींद्र देसाई यांच्यासह इतर अधिकारी व कर्मचाऱ्यांना धक्काबुक्की, शिवीगाळ केली. अतिक्रमण काढण्यास विरोध करतानाचे व्हिडीओ बनवून नगरसेवकांनी ते सोशल मीडियावर टाकून अधिकाऱ्यांची बदनामी केल्याचेही तक्रारीत म्हटले आहे. अधिक तपास पोलीस निरीक्षक श्रीनिवास रोयलावार करीत आहेत. दरम्यान, या कारवाईच्या निषेधार्थ एमआयएम प्रदेशाध्यक्ष इम्तियाज जलील यांनी महापालिका आयुक्तांविरुद्ध आंदोलन छेडण्याचा इशारा दिला आहे. लोकप्रतिनिधींवर गुन्हे दाखल करणे ही दडपशाही आहे. प्रशासनाने हॉकर्सना हक्काची जागा न दिल्यानेच ही परिस्थिती उद्‌भवली आहे, असे ते म्हणाले.