गंगापूर (मेट्रोपोलिस पोस्ट वृत्तसेवा) : गंगापूर पोलीस ठाण्याच्या हद्दीतील एका गावातील २८ वर्षीय तरुणीचे लग्न प्रियकराने नियोजित वराला मेसेज, फोटो पाठवून मोडल्याचा धक्कादायक प्रकार समोर आला आहे. दोघे दीर्घकाळ प्रेमसंबंधात होते, मात्र कॉलेजनंतर घरी आल्यावर तिच्या घरच्यांनी निवडलेला मुलगाही तिला आवडला आणि साखरपुडाही झाला होता. गंगापूर पोलिसांनी प्रियकराविरुद्ध शनिवारी (२८ फेब्रुवारी) गुन्हा दाखल केला आहे.
तनिषाने (नाव बदलले आहे) या प्रकरणात तक्रार दिली आहे. तक्रारीनुसार, ती २०२१-२२ मध्ये श्रीरामपूरच्या पॉलटेक्निक कॉलेजमध्ये शिकत होती. त्याच कॉलेजमध्ये शिकणाऱ्या तेजस दत्तात्रय मोरे (रा. अशोकनगर ता. श्रीरामपूर जि. अहिल्यानगर) याच्यासोबत तिची ओळख झाली. तेजस आणि तिने मोबाइल नंबर एकमेकांना दिले होते. मोबाइलवर ते एकमेकांना बोलत असत. तेजस म्हणायचा, की तू मला भेटायला ये. जर तू मला भेटायला आली नाहीस तर मी आत्महत्या करेल... त्यामुळे तनिषाने मी तुझ्यावर प्रेम करणार नाही. आपण फक्त मैत्री करू, असे म्हटले. तरीही तेजस ऐकत नसल्याने तनिषाने त्याच्यासोबत प्रेमसंबंध निर्माण केले. त्यानंतर तिचे शिक्षण पूर्ण झाल्यानंतर ती गावी आली.
दोन- तीन महिन्यांपासून तिच्या आई-वडिलांनी तिच्या लग्नासाठी मुलगा बघायला सुरुवात केली. याच दरम्यान ७ फेब्रुवारीला भरत (नाव बदलले आहे) तिला बघायला आला. दोघे एकमेकांना आवडल्याने त्यांनी लग्नास होकार दिला. तिचा साखरपुडा १५ फेब्रुवारीला तिच्या घरीच झाला. तनिषाचा साखरपुडा झाल्याची माहिती तेजसला कळल्यानंतर १६ फेब्रुवारीला दुपारी चारच्या सुमारास तेजसने त्याच्या इन्स्टाग्राम खात्यावरून भरतला मेसेज करून सांगितले, की माझे तनिषासोबत प्रेमसंबंध होते. माझे तिच्यासोबत मार्च महिन्यात लग्न होते.
तू तिच्यासोबत लग्न करू नको. तू जर तिच्यासोबत लग्न केले तर तुला जिवंत सोडणार नाही, अशा अनेक प्रकारचे मेसेज तेजसने भरतला केले. त्याने तनिषासोबत प्रेमसंबंधात असताना मोबाइलमध्ये काढलेले फोटोही भरतला पाठवले. नंतर भरतने तनिषाच्या भावाला बोलावून सांगितले, की तेजसने तुझ्या बहिणीबद्दल मेसेज व फोटो मला पाठविलेले आहेत. मला तुझ्या बहिणीसोबत लग्न करायचे नाही. तेजसने भरतला पाठविलेल्या मेसेजमुळे व फोटोमुळे लग्न मोडल्याची तक्रार तनिषाने गंगापूर पोलीस ठाण्यात धाव घेऊन दिली. त्यावरून पोलिसांनी तेजसविरुद्ध गुन्हा दाखल करण्यात आला आहे. अधिक तपास पोलीस निरीक्षक कुमारसिंग राठोड करत आहेत.
.jpg)
.jpg)
