छत्रपती संभाजीनगर (मेट्रोपोलिस पोस्ट वृत्तसेवा) : बनावट नोटा तयार करून देण्याचे आमिष दाखवून गंडविणाऱ्या दोघांना बेगमपुरा पोलिसांनी शुक्रवारी (२८ फेब्रुवारी) दुपारी अडीचच्या सुमारास न्यू पहाडसिंगपुऱ्यातील मुख्य रस्त्यावर सापळा रचून अटक केली. शेख फेरोज शेख रफिक (वय ३१) आणि शेख वसीम शेख ताहेर (२९, दोघेही रा. बिलोली, नांदेड) अशी अटक केलेल्यांची नावे आहेत.
पोलीस अंमलदार दीपक मालकर यांनी या प्रकरणात तक्रार दिली आहे. इनोव्हा कारमधून (क्र. टीएस ०७ जेडब्ल्यू ०६६६) फेरोज आणि वसीम शहरात आले. बनावट नोटा तयार करून देण्याचे आमिष ते नागरिकांना दाखवत असल्याची माहिती पोलिसांना मिळाली. पोलीस उपनिरीक्षक मारोती मदेवाड यांच्या पथकाने लगेचच न्यू पहाडसिंगपुऱ्यात धाव घेऊन दोघांच्या मुसक्या आवळल्या. कारसह ५०० रुपयांच्या नोटांच्या आकाराचे पांढऱ्या कागदांचे बंडल, एक दोन बाय अडीच फुटांचा प्लायवूडचा चौकोनी बॉक्स (ज्यावर बटणे, प्लग, लाइट्स आणि व्होल्टेज मीटर लावून मशीनसारखे रूप दिले होते), आयोडिन द्रव्याची प्लास्टिकची बाटली, इलेक्ट्रिक वायर्स आणि पांढरी पावडर असा एकूण १,१५० रुपयांचा मुद्देमाल जप्त केला.
चौकशीत संशयितांनी सांगितले, की ते ५०० रुपयांच्या चलनातील नोटांना आयोडिन लावून आधी काळे करत. नंतर नोटा एका प्लेटवर ठेवून, वीज प्रवाह असलेला खोटा मशीनचा बॉक्स चालू करून त्या नोटा सल्फ्युरिक पावडरने धुऊन दाखवत. त्यातील पावडरमुळे खऱ्या नोटेवरील आयोडिन निघून जाऊन नोट स्वच्छ होत असे. तीच खरी नोट बाजारात चालवण्यास द्यायचे. १ लाखाच्या बदल्यात ४ लाखांच्या बनावट नोटा देण्याचे आमिष दाखवायचे. पांढऱ्या कागदांचे बंडल देऊन पसार व्हायचे.
.jpg)
.jpg)
