पैशांनी भरलेली बॅग, हातात सिगारेट, मंत्री संजय शिरसाट पुन्हा गोत्‍यात! (Video)

छत्रपती संभाजीनगर (सीएससीएन वृत्तसेवा) : मंत्री संजय शिरसाट यांना अडचणीत आणण्याचे मोठे षड्‌यंत्र सुरू असल्याचा संशय यावा, अशा घटना लागोपाठ घडत आहेत. हॉटेल व्हिट्‌सच्या लिलाव प्रकरणापासून लागलेली साडेसाती पाठ सोडायला तयार नसून, आता ठाकरे गटाचे खासदार संजय राऊत यांनी एक्‍सवर शिरसाटांचा एक व्हिडीओ शेअर केला आहे. त्‍यात शिरसाट हे हातात सिगारेट घेऊन ओढताना दिसत आहेत. बाजूलाच पैशांची बॅग भरलेली आहे. एका खोलीमधील बेडवर फोनवर बोलताना शिरसाट दिसत आहेत. त्‍यांचा पाळीव श्वानही व्हिडीओत दिसत आहे.

आयकर विभागाच्या नोटिशीनंतर शिरसाटांचा हा व्हिडीओ माझ्याकडे आल्याचे संजय राऊत यांनी म्हटले आहे. हा व्हिडीओ पाहून मुख्यमंत्री देवेंद्र फडणवीस शिरसाटांवर कारवाई करणार का, असा सवालही त्‍यांनी केला आहे. दरम्‍यान, या व्हिडीओवर संजय शिरसाट यांनी स्पष्टीकरण दिलं असून, ते म्‍हणाले, की व्हिडीओ माझ्या बेडरूममधीलच आहे. मी प्रवास करून आल्यानंतर बेडवर बसल्याचे व्हिडीओत दिसतंय. बेडशेजारी आमचा श्वानही आहे.

प्रवासातून आल्यानंतर माझी कपड्यांची अडकवलेली बॅग दिसतेय, त्याची बातमी होते, याचं मला आश्चर्य वाटतंय, असे शिरसाट यांनी म्‍हटलं आहे. माझ्याकडे मातोश्री व मातोश्री २ नाही. माझं घर माझ्या मतदारसंघातील प्रत्येकासाठी उघडं असतं. कार्यकर्ते येतात, उत्साहाच्या भरात कोणीतरी व्हिडिओ काढला असेल. माझ्या घरात चिठ्ठी देऊन कोणालाही बोलावलं जात नाही. काम काय, नाव काय, अशा गोष्टी विचारल्या जात नाहीत, असेही शिरसाट यांनी म्‍हटले आहे.

राऊत काय म्‍हणाले…
संजय राऊत यांनी व्हिडीओ टाकताना पंतप्रधान नरेंद्र मोदी, केंद्रीय गृहमंत्री अमित शाह, मुख्यमंत्री देवेंद्र फडणवीस आणि पंतप्रधान कार्यालयाला टॅग केले आहे. हा रोमांचक व्हिडीओ पंतप्रधान मोदी व अमित शाह यांनी पाहायला हवा. देशात काय चाललंय हे त्यांनी पाहावं. महाराष्ट्रातील एका मंत्र्यांचा हा व्हिडीओ खूप काही सांगून जातो. हा व्हिडीओ पाहून मला मुख्यमंत्री देवेंद्र फडणवीस यांची दया येते. स्वतःच्या अब्रूचे किती धिंडवडे ते फक्त पाहात बसणार आहेत? हतबलतेचे दुसरे नाव फडणवीस, अशी टीका राऊत यांनी केली आहे.