कश अन्‌ कॅश : व्हिडीओ व्हायरल करणाऱ्या राऊतांवर संजय शिरसाट ठोकणार अब्रुनुकसानीचा दावा, आ. अंबादास दानवे म्हणाले…

छत्रपती संभाजीनगर (सीएससीएन वृत्तसेवा) : कश आणि कॅशसोबत असलेल्या मंत्री संजय शिरसाट यांचा बेडरूममधील व्हिडीओ व्हायरल करून बदनाम करण्याचा प्रयत्‍न केल्याप्रकरणी ठाकरे गटाचे नेते संजय राऊत यांना मंत्री शिरसाट हे मानहानीची नोटीस बजावणार असून, त्‍यांनी माफी मागितली नाही तर अब्रुनुकसानीचा दावा ठोकणार आहेत.

राऊत यांनी माफी मागितली नाही तर त्यांच्याविरुद्ध गुन्हा दाखल करण्यात येईल. ते पुन्हा सांगतील अशा अनेक नोटीस आम्ही खिशात घेऊन फिरतो. परंतु कायद्याच्या चौकटीत बसून मी आज नोटीस पाठवणार आहे. उत्तर दिले नाही तर फौजदारी गुन्हा दाखल करेन, असा इशारा शिरसाट यांनी दिला. संजय राऊत रोज सकाळी लोकांच्या शिव्या खातात. त्‍यामुळे त्यांना मान-अपमान काही कळत नाही. सगळ्या दलालांची एक गँग महाराष्ट्रामध्ये कार्यरत आहे. याचे सर्व पुरावे माझ्याकडे आहे. आता त्यांना त्यांच्याच भाषेत उत्तर द्यावे लागणार आहे, असे मंत्री शिरसाट म्‍हणाले.

कोणी कुठे कुठे सरकारी बंगल्यात पार्ट्या केल्या, त्यांचे व्हिडीओ मला पुढे आणावे लागतील. मी असे प्रकार बाहेर काढेल तेव्हा त्यांना पळता भुई थोडी होईल. असे राजकारण महाराष्ट्राने आजपर्यंत पाहिले नाही. मला टार्गेट करण्याचा प्रयत्न होत असल्याचे दिसून येत आहे, असे शिरसाट म्‍हणाले. दरम्‍यान, मंत्री संजय शिरसाट यांना उपमुख्यमंत्री एकनाथ शिंदे यांनी कडक शब्दांत समज दिल्याची माहिती समोर येत आहे. शिंदे यांनी संजय शिरसाट व संजय गायकवाड यांच्याशी संवाद साधला आणि दोघांचेही कान टोचले. बेशिस्त विधान व वर्तनामुळे पक्षाची प्रतिमा डागाळत असून, यापुढे असा बेशिस्तपणा खपवून घेणार नाही, असा इशाराही त्‍यांनी दिला.

दानवेंचा पुन्हा शिरसाटांवर आरोप
ठाकरे गटाचे नेते आ. अंबादास दानवे यांनी हॉटेल व्हिट्‌स लिलाव प्रकरण लावून धरले आहे. आता त्‍यांनी मंत्री संजय शिरसाट यांच्या पत्नी व मुलासह इतर तीन भागीदार कोण होते, याचा खुलासा करण्याची मागणी केल्याने खळबळ उडाली आहे. शिरसाट यांच्या मुलाने माध्यमांसमोर येऊन हॉटेल खरेदीबाबतची माहिती पारदर्शकपणे जाहीर करावी, असे आव्हानही त्‍यांनी दिले.

तीन पक्षांच्या सरकारमध्ये एकमेकांचा पत्ता कापण्याचे काम सुरू, भास्कर जाधव यांना शंका
तीन पक्षांच्या सरकारमध्ये अंतर्गत राजकारण सुरू झाले असून, एकमेकांचा पत्ता कापण्याचे काम सुरू झाले आहे. आधी धनंजय मुंडे, जयकुमार गोरे यांच्यानंतर आता संजय शिरसाट यांची विकेट पाडण्यासाठी डाव सुरू आहे, असे खळबळजनक वक्‍तव्‍य ठाकरे गटाचे आमदार भास्कर जाधव यांनी केले आहे. हॉटेल व्हिट्‌स लिलाव प्रकरण, त्‍यानंतर जमीन घोटाळ्याचे आरोप आणि आता बेडरूममध्ये पैशांचा बॅग घेऊन बसलेला व्हिडीओ यामुळे शिरसाटांना अडचणीत आणले जात असल्याची चर्चा सुरू झाली आहे. या चर्चेला बळ देण्याचे काम भास्कर जाधव यांनी केले. शिरसाट यांचा व्हिडीओ जवळच्याच कुणीतरी माणसाने काढला असेल, असेही जाधव यांनी सांगत महाराष्ट्रात या लोकांचे सरकार निवडून दिल्याबद्दल जनतेला पश्चाताप होतोय. मोठ्या प्रमाणात यांचे आमदार निवडून आल्यामुळे ही मस्ती आलेली आहे. विरोधी पक्ष हा थोडा आहे आणि आमचा आवाज दाबला जातोय. महाराष्ट्राच्या अब्रूची लक्तरे रोज वेशीवर टांगली जात आहेत. आपण यांना या ठिकाणी आणून काय केले याचा विचार जनतेने केला पाहिजे, असे टीकास्‍त्रही त्‍यांनी सोडले.