छत्रपती संभाजीनगरहून पती दोंडाईचाला येऊन मला छळतो, जगणे असह्य केलेय, विवाहितेची सिडको MIDC पोलिसांत तक्रार

छत्रपती संभाजीनगर (सीएससीएन वृत्तसेवा) : पती दारू पिण्यासाठी पैसे मागतात. नकार दिला की शिवीगाळ करून मारहाण करतात. पतीमुळे मला खूप मानसिक त्रास होत असून जगणे असह्य झाले आहे, अशी तक्रार विवाहितेने सिडको एमआयडीसी पोलीस ठाण्यात केली आहे. त्‍यावरून पोलिसांनी तिच्या पतीविरुद्ध शुक्रवारी (२९ ऑगस्ट) गुन्हा दाखल केला आहे.

सौ. मंदा महेंद्र म्हस्के (वय ३८, रा. कामगार कॉलनी चिकलठाणा छत्रपती संभाजीनगर, ह. मु. दोंडाईचा, ता.शिंदखेडा, जि. धुळे या विवाहितेने या प्रकरणात तक्रार दिली आहे. मंदा या दोंडाईचा येथे निवासी गतिमंद मुलांच्या शाळेवर परिचारिका आहे. त्‍यांचे लग्‍न ९ मे २००४ रोजी महेंद्र धोंडिबा म्हस्के (वय ४३, रा. चित्तेपिंपळगाव ता. छत्रपती संभाजीनगर) याच्यासोबत लग्‍न झाले होते. लग्नानंतर एक महिना तिला पती व सासरच्या लोकांनी नीट वागणूक दिली. नंतर पती महेंद्र दारू पिण्याच्या सवयीचे असल्याचे त्यांना कळाले. पती महेंद्र रोज दारू पिऊन येऊन चारित्र्यावर संशय घेऊन मंदा यांना शिवीगाळ करून हाताचापटाने मारहाण करायचा. रंगावरून टोमणे मारायचा.

तू मला आवडत नाही, असे म्हणून वारंवार अपमान करायचा.  लग्नाला तीन वर्षे झाले तरी मूलबाळ होत नसल्याने सासू केसरबाई धोंडिबा म्हस्के (वय ७०) ही मंदा यांना टोमणे मारून शिवीगाळ करत असायची. नवीन घर घेण्यासाठी तुझ्या आईकडून पैसे घेऊन ये, असे म्‍हणून तिला पैशांची मागणी केली. मंदा यांनी पैसे आणण्यास नकार दिला असता पती रोज दारू पिऊन येत त्यांना हाताचापटाने मारहाण करू लागला. घराबाहेर हाकलून देऊ लागला. सध्या नोकरीमुळे मंदा या दोंडाईचाला आहेत. तिथे शाळेवर जाऊन पती त्यांना दारू पिण्यासाठी पैसे मागतात. पैसे देण्यास नकार दिला की शिवीगाळ करून मारहाण करतात. पतीमुळे मला खूप मानसिक त्रास होत असून जगणे असह्य झाले आहे, असे तक्रारीत मंदा यांनी म्हटले आहे. अधिक तपास पोलीस अंमलदार सुभाष पवार करत आहेत.