वाळूज MIDC त हिट ॲन्‍ड रन : कामावरून घरी परतणाऱ्या तरुणाला आयशर वाहनाने उडवले, जागीच मृत्‍यू

By City News Desk

On 31 Aug 2025

वाळूज MIDC त हिट ॲन्‍ड रन : कामावरून घरी परतणाऱ्या तरुणाला आयशर वाहनाने उडवले, जागीच मृत्‍यू

छत्रपती संभाजीनगर (सीएससीएन वृत्तसेवा) : वाळूज एमआयडीसीतील जी सेक्टरमध्ये जे. के. कंपनीजवळ आयशर वाहनाने दुचाकीला उडवले. यात दुचाकीस्वाराचा जागीच मृत्‍यू झाला. ही घटना शुक्रवारी (२९ ऑगस्ट) रात्री सातला घडली. रेणुकादास रामेश्वर मोरे (वय २१, रा. रा. माया ज्योती पार्क वडगाव कोल्हाटी, वाळूज एमआयडीसी) असे मृत्यू झालेल्याचे नाव आहे.

मनोज रामेश्वर मोरे (वय १९, रा. माया ज्योती पार्क वडगाव कोल्हाटी) याने या प्रकरणात तक्रार दिली आहे. तो खासगी कंपनीत काम करतो. शुक्रवारी सकाळी ७ ला त्याचा भाऊ रेणुकादास मोटारसायकलीने (MH20 HE 1937) औरंगाबाद ऑटो कंपनीत कामाला गेला. रात्री सातला ड्युटी संपवून घरी येत असताना वाळूज एमआयडीसीतील जी सेक्टर जे. के. कंपनीजवळ त्याला आयशर वाहनाने जोरात धडक दिली.

यात रेणुकादास गंभीर जखमी झाला. मदतीसाठी धावलेल्या एका नागरिकाने अपघाताची माहिती कॉल करून मनोजला दिली. मनोज व त्‍याचा मित्र प्रवीण काळे लगेचच अपघातस्थळी आले. तोपर्यंत रेणुकादास यांना नागरिकांनी घाटी रुग्णालयात नेले होते. उपचारादरम्‍यान रेणुकादासचा रात्री साडेआठच्या सुमारास मृत्‍यू झाला. मनोजच्या तक्रारीवरून अनोळखी आयशर चालकाविरुद्ध वाळूज एमआयडीसी पोलिसांनी शनिवारी (३० ऑगस्ट) गुन्हा दाखल केला आहे. त्‍या आयशरचालकाचा शोध घेतला जात आहे. अधिक तपास पोलीस निरीक्षक रामेश्वर गाडे करत आहेत.