फुलंब्री (मेट्रोपोलिस पोस्ट वृत्तसेवा) : फुलंब्रीतील कुरेशी मोहल्ल्यात सातत्याने गोवंशांची कत्तल सुरू असल्याचे समोर आले आहे. १९ मार्चच्या मोठ्या कारवाईनंतरही आज, २२ मार्चला पुन्हा गोवंशांची कत्तल झाली. फुलंब्री पोलिसांना कळताच त्यांनी धाव घेऊन मांस जप्त केले. एकाला ताब्यात घेतले. त्याचा साथीदार पळून गेला. ही कारवाई सकाळी ११ ला करण्यात आली.
पोलीस उपनिरीक्षक सुग्रीव चाटे यांनी याप्रकरणात तक्रार दिली आहे. आज त्यांना गोपनीय माहिती मिळाली, की फुलंब्री शहरातील कुरेशी मोहल्ल्यात गोवंशीय जनावरांची कत्तल करून मांस विकले जात आहे. त्यांनी ही माहिती पोलीस निरीक्षक संजय सहाणे यांना दिली. त्यांच्या मार्गदर्शनाखाली श्री. चाटे, पोलीस अंमलदार श्री. सोनुने, श्री. पाचंगे, श्री. पांढरे, श्री. चव्हाण, श्री. शेजूळ, महिला पोलीस अंमलदार श्रीमती पवार यांनी कुरेशी मोहल्ल्यात छाप्याचे नियोजन केले.
पोलीस पथक सकाळी ११ ला कुरेशी मोहल्ल्यात धडकले असता पोलिसांना पाहून दोघांपैकी एक जण पळून गेला. दुसऱ्याला पोलिसांनी पकडले. शारुख अमीर कुरेशी (वय २६, रा. कुरेशी मोहल्ला, फुलंब्री) असे त्याने नाव सांगितले. त्याने पोलिसांना सांगितले, की आम्ही गोवंशीय जनावर कापले आहे. पळून गेलेल्याचे नाव सलमान अमीर कुरेशी (रा. कुरेशी मोहल्ला, फुलंब्री) आहे. पोलिसांनी त्याच्याकडून १० किलो गोवंशीय मांस जप्त केले. कत्तलीसाठी वापरलेली शस्त्रेही जप्त केली. शारुखला पकडून फुलंब्री पोलीस ठाण्यात आणत त्याच्यासह सलमानविरुद्ध गुन्हा दाखल केला आहे.
.jpg)
