छत्रपती संभाजीनगर (मेट्रोपोलिस पोस्ट वृत्तसेवा) : तंत्रज्ञान जितके प्रगती घडवतेय, तितकेच ते मानवी नितीमूल्यांच्या अधोगतीला कारणीभूत ठरत आहे. स्वैराचार, अनैतिकता वाढत चालली आहे. पती, दोन मुली असा सुखी संसार सुरू असताना यवतमाळची २४ वर्षीय तरुणी सोशल मीडियावरून छत्रपती संभाजीनगरच्या तरुणाच्या प्रेमात पडली. त्याच्यासाठी पती अन् मोठी मुलगी सोडली अन् छोट्या मुलीला घेऊन थेट तिने चक्क छत्रपती संभाजीनगर गाठले. पण प्रियकराने ऐनवेळी हात दिला, तो तिला भेटायला आलाच नाही. दामिनी पथकाने तरुणीला ताब्यात घेतले आणि पुढील कारवाईसाठी सिडको एमआयडीसी पोलिसांच्या ताब्यात दिले.
नक्की काय घडलं ?यवतमाळची २४ वर्षीय विवाहिता पल्लवी (नाव बदलले आहे) सोशल मीडियावरून एका तरुणाच्या संपर्कात आली. संवाद वाढून दोघांत ऑनलाइन प्रेमसंबंध जुळले. त्याने तिच्याशी प्रेमाचे नाटक सुरू केले. प्रियकराशी बोलण्यात अडथळा होऊ लागल्याने ती छोट्या मुलीला सोबत घेऊन आई-वडिलांकडे माहेरी आली. मोठी मुलगी आणि पतीला सोडून माहेरी राहू लागली. तिचे आई-वडील तिला पतीकडे जाण्यासाठी समजावून सांगत होते. मात्र त्यांचे न ऐकता पल्लवी तीन वर्षांच्या मुलीसह थेट छत्रपती संभाजीनगर शहरात आली. सिडको बसस्थानकावर उतरली. मात्र प्रियकर चक्क तिच्या ‘कव्हरेज क्षेत्रा’च्या बाहेर गेला.
ना कॉल लागत होता, ना तो मेसेजला उत्तर देत होता. त्याची वाट पाहत ती तीन दिवसांपासून मुलीसह सिडको बसस्थानकातच थांबली. बसस्थानकावरील सुरक्षारक्षकाच्या ही बाब लक्षात येताच त्याने दामिनी पथकाला कळवले. गुरुवारी (१९ मार्च) रात्री पोलीस अंमलदार कल्पना खरात, मोनिका दिवे, सोनाली निकम, उषा सोनवणे यांनी पल्लवीला ताब्यात घेतले. तिची आस्थेवाइकपणे चौकशी केली. तिच्या कथित प्रियकराशी संपर्क साधला. मात्र त्याने चक्क जबाबदारी झटकली. अखेर तिच्या कुटुंबाशी संपर्क साधून पथकाने तिला पुढील कारवाईसाठी सिडको एमआयडीसी पोलिसांच्या ताब्यात दिले.
.jpg)
.jpg)
.jpg)
.jpg)
