छत्रपती संभाजीनगर (मेट्रोपोलिस पोस्ट वृत्तसेवा) : नारेगावमधील अवैध गर्भपात प्रकरणात आणखी दोघांना सिडको एमआयडीसी पोलिसांनी शुक्रवारी (२० मार्च) पिसादेवी परिसरात अटक केली आहे. राहुल माणिक झोंड (वय २६, रा. मयूर पार्क) आणि त्याचा साथीदार सोमनाथ परसराम बारासे (वय ३१, रा. न्यू हनुमाननगर, कमळापूर फाटा, वाळूज एमआयडीसी) अशी त्यांची नावे आहेत. राहुलने विदेशी बनावटीचे पोर्टेबल एक्सरे मशीन ऑनलाइन खरेदी करून गर्भलिंगनिदानाचा धंदा उघडला होता. दोघांकडून मशीन, एक टॅब आणि कार जप्त करण्यात आली आहे.
नारेगावच्या बलूच गल्लीत पाच महिन्यांची गर्भवती असलेल्या २६ वर्षीय विवाहितेचा गर्भपात सासरच्यांनी ६ मार्चला रात्री घडविला. त्याचवेळी विवाहितेच्या वडिलांनी पोलिसांसह येऊन धडक दिल्याने गर्भपात करणारी टोळी पळून गेली होती. पोलिसांनी विवाहितेचा पती अरबाज फेरोज सय्यद, सासू आशिया फेरोज सय्यद, सासरे फेरोज मन्सूर सय्यद (सर्व रा. बलूच गल्ली, नारेगाव) यांना अटक केली होती. मराठवाड्यात अनेक वर्षांपासून अवैध गर्भपाताचे रॅकेट चालवणारा डॉ. संतोष सोनवणे, जालन्यातील परिचारिका कमळ गोकुळ तिनगोटे, मयूरपार्क येथील फेबो डोमेस्ट महालॅब चालक अनिल जाधव (सपकाळ) यांनी हा गर्भपात केल्याचे समोर आले होते. या तिघांचा शोध अद्याप लागलेला नाही, पण या रॅकेटची पाळेमुळे खोदण्याचे काम पोलिसांकडून सुरू आहे. अरबाजच्या चौकशीतून महापालिका रुग्णालयातील कंत्राटी कर्मचारी शंकर आढाव (वय २७) याला अटक केली. अरबाज गर्भवती पत्नीला नियमित चाचणीसाठी नारेगावच्या मनपा रुग्णालयात घेऊन जायचा. तेथे कंत्राटी कर्मचारी शंकरसोबत त्याची ओळख झाली होती. शंकरने त्याला महालॅब चालक अनिल जाधवला भेटवले होते. त्यानंतर अरबाजचा संपर्क डॉ. सोनवणेशी करून देण्यात आला होता. शुक्रवारी अटक केलेला राहुल झोंड हा आधी डॉ. सोनवणेचा चालक होता. यापूर्वी जेव्हा सोनवणेला अटक झाली होती, तेव्हा राहुलने गर्भलिंगदानाचे काम स्वतःकडे घेतले होते. तो केवळ १२ वी उत्तीर्ण असून, युट्यूबवरून लिंगनिदान कसे करायचे हे शिकला. त्याने शहरातील काही डॉक्टरांकडेही ओटी असिस्टंट म्हणून काम पाहिले आहे. त्याचा साथीदार सोमनाथ दहावी शिकलेला असून, तोही डॉ. सोनवणेचा जुना चालक आहे.
दाम्पत्याला पिसादेवी परिसरात बोलावले...अनधिकृत गर्भपात रॅकेटचा तपास करत असतानाच पोलिसांना राहुलबद्दल कळले. त्यांनी डमी पती-पत्नीच्या माध्यमातून राहुलशी संपर्क केला व गर्भलिंग निदान करण्याबाबत विचारले. राहुलने २५ हजार रुपये सांगून पिसादेवी परिसरात बोलावले. ठरल्याप्रमाणे राहुल आणि त्याचा साथीदार कारने पिसादेवी परिसरात आले. डमी दाम्पत्याने त्यांची भेट घेताच पोलिसांनी झडप घातली. दोघांना न्यायालयात हजर केले असता सात दिवसांची पोलीस कोठडी सुनावण्यात आली. ही कारवाई पोलीस निरीक्षक सोमनाथ जाधव, सहायक पोलीस निरीक्षक कैलास लहाने पोलीस अंमलदार गणेश डोईफोडे, देविदास काळे, मुकुंद सोनवणे, गौरी भंडारी, होमगार्ड नदीम पठाण, सुवर्णा लाखूळकर यांनी केली.
.jpg)
