छत्रपती संभाजीनगर (मेट्रोपोलिस पोस्ट वृत्तसेवा) : सुरतहून छत्रपती संभाजीनगरमध्ये नशेची औषधी घेऊन आलेला कुख्यात ड्रग्ज तस्कर सय्यद अझहर सय्यद अकबर (वय २५, रा. चांदमारी, छावणी) हा पोलिसांना चमका देण्यात यशस्वी ठरला. नगरनाक्यावर शनिवारी (२१ मार्च) सकाळी सहाला पोलिसांनी सापळा रचला होता, पण पोलिसांना पाहताच अझहरने बॅग सोडून पळ काढला. त्याने फेकलेल्या बॅगमध्ये २ हजार नशेच्या गोळ्या व सिरपच्या ११८ बाटल्या मिळून आल्या. अझहर हा कुख्यात गुन्हेगार अंधा फिरोजचा भाऊ आहे.
शहरातील नशेच्या बाजारावर अंकुश लावण्यासाठी शहर पोलिसांच्या अंमलीपदार्थविरोधी पथकाकडून सातत्याने कारवाया सुरू आहे. अझहर हा एक दिवसाआड सुरत वारी करून नशेच्या गोळ्या आणि लिक्विड औषधी आणत होता. ही बाब अंमलीपदार्थविरोधी पथकाला मिळाली होती. त्यानंतर पोलीस उपअधीक्षक साईनाथ ठोंबरे यांच्या आदेशावरून वरिष्ठ पोलिस निरीक्षक गीता बागवडे, सहायक पोलीस निरीक्षक दीपाली पाटील यांनी नगर नाक्यावरील ट्रॅव्हल्सच्या थांब्यावर सापळा रचला. मुसाफीर ट्रॅव्हल्स थांबताच पथक सतर्क झाले. बसमधून उतरलेल्या अझहरने पोलिसांना पाहून बॅग फेकून देत, दुभाजकावरून उडी मारली आणि पळून गेला.
पोलिसांनी पाठलाग करण्याचा प्रयत्न केला. मात्र, अवजड वाहनांच्या वाहतुकीमुळे ते थांबले. अझहरविरुद्ध छावणी पोलीस ठाण्यात गुन्हा दाखल करण्यात आला आहे. ड्रग्ज तस्करीप्रकरणी पाचहून अधिक गुन्हे दाखल असलेल्या अंधा फिरोजचा अझहर हा भाऊ असून, फिरोजला यापूर्वी दोन वेळा अटक झाली आहे. कारवाईत सहायक पोलीस उपनिरीक्षक विश्वास शिंदे, पोलीस अंमलदार नितीन जाधव, हरीश मुंढे, अतुल तुपे, राहुल काळे, ज्योती कीर्तीकर, आम्रपाली सूर्यवंशी, प्रियांका पवार यांनी भाग घेतला. पोलिसांनी जप्त केलेला मुद्देमाल ९ लाख ३९ हजार रुपयांचा आहे.
.jpg)
