छत्रपती संभाजीनगरमध्ये युती केवळ नावालाच!; शिंदे गटाने ४७ तर भाजपने दिले ४३ गटांत उमेदवार!; भाजपने अंधारात ठेवल्याचा शिंदे गटाचा आरोप

छत्रपती संभाजीनगर (मेट्रोपोलिस पोस्ट वृत्तसेवा) : जिल्हा परिषद, पंचायत समिती निवडणुकीत भाजप-शिंदे गटाची युती केवळ नावालाच उरली असून, उमेदवारी अर्ज मागे घेण्याच्या शेवटच्या दिवशीही दोन्ही पक्षांच्या नेत्‍यांनी आपल्या उमेदवारांचे अर्ज मागे घेण्याबाबत एकमेकांना प्रतिसाद दिला नाही. त्यामुळे आता युतीत कुस्ती पहायला मिळणार आहे. आताच्या चित्रानुसार ४७ गटांत भाजपने तर ४३ गटांत शिंदे गटाने उमेदवार दिले आहेत. याआधी युती करून २७ गटांत भाजप तर २५ गटांत शिंदे गट लढेल, असे लढले होते. आता महापालिकेप्रमाणेच या निवडणुकीतही युती तुटली आहे. शिवाय मैत्रीपूर्ण लढतही होणार नाही.

छत्रपती संभाजीनगर जिल्ह्यात जिल्हा परिषदेचे ६३ गट असून, पंचायत समित्यांचे १२६ गण आहेत. सिल्लोड-सोयगाव तालुके वगळून अन्य तालुक्यांतील ५२ जागांचे वाटप भाजप-शिंदे गटाने केले होते. मात्र उमेदवारी अर्ज भरण्याच्या शेवटच्या दिवशी दोन्ही पक्षांचे आपापल्या उमेदवारांना बी-फॉर्म देत दोन्ही पक्षांनी युतीवर प्रश्नचिन्ह निर्माण केले. मंत्री अतुल सावे यांनी स्पष्टपणे कबूल केले, की सध्या तरी युती नावापुरतीच राहिली आहे. तर शिंदे गटाचे जिल्हाप्रमुख रमेश पवार यांनी भाजपवर आरोप केला. ते म्हणाले, की भाजपने अंधारात ठेवल्यामुळे आमची धावपळ झाली. शिंदे गटाने आता जवळपास सर्व ठिकाणी उमेदवार दिले आहेत. युती तुटली आहे असे आता स्पष्ट झाले आहे. पैठण तालुक्यातील भाजपचे सर्व उमेदवार अपक्ष म्हणून रिंगणात आहेत. 

६३ गटांत ३११ उमेदवार तर १२६ गणांत उरले ५७० उमेदवार
दरम्यान, उमेदवारी अर्ज मागे घेण्याच्या शेवटच्या तारखेपर्यंत (२७ जानेवारी) अनेक बंडखोरांनी आपली तलवार म्यान केल्याचे पहायला मिळाले. त्यामुळे आता ६३ गटांत एकूण ३११ उमेदवार उरले असून, १२६ गणांमध्ये ५७० उमेदवार रणांगणात उतरले आहेत.

तालुका	गट	रिंगणातील उमेदवार	गण	रिंगणातील उमेदवार
छत्रपती संभाजीनगर	१०	४८	२०	९०
सिल्लोड	९	३९	१८	६२
वैजापूर	८	३६	१६	६३
कन्नड	८	५२	१६	१०३
खुलताबाद	३	११	६	२५
गंगापूर	९	३६	१८	६७
पैठण	९	६३	१८	१०४
फुलंब्री	४	१४	८	३०
सोयगाव	३	११	६	२६