शाब्दिक बाचाबाचीत अचानक तरुणीच्या तोंडावर काळ्या रंगाचा स्प्रे मारला!; सिडको एन ६ मधील घटना, एम्समध्ये उपचार सुरू

छत्रपती संभाजीनगर (मेट्रोपोलिस पोस्ट वृत्तसेवा) : शेजारणीसोबत भांडताना शेजारीण व तिच्या मुलगा-मुलीने अचानक कसला तरी काळा स्प्रे तरुणीच्या चेहऱ्यावर मारल्याने चेहरा आणि डोळ्यांची प्रचंड आग होऊन लागल्याने तरुणीला एम्समध्ये दाखल करावे लागले. सध्या तिच्यावर उपचार सुरू आहेत. ही घटना एन ५ सिडको सावरकरनगर येथे रविवारी (२५ जानेवारी) दुपारी ३ ला घडली.

जान्हवी दिनेश गंगावणे (वय २१, रा. एन ५ सिडको सावरकरनगर) या तरुणीने या प्रकरणात तक्रार दिली आहे. तिच्यावर सध्या एम्स हॉस्पिटलमध्ये उपचार सुरू आहेत. ती व तिची मैत्रीण रूम करून राहते. एम्स हॉस्पिटलमध्ये रिसेप्शनचे काम करते. रविवारी (२५ जानेवारी) दुपारी ३ ला जान्हवी व तिची मैत्रीण सुट्टी असल्याने घरी होत्या. तिने खाली येऊन खालच्या मजल्यावर राहणाऱ्या सुरेखा मोतीराम थोटे हिला सांगितले, की तू बाहेरून गेट बंद करून घेऊ नको. मला बाहेर जायचे आहे. त्यावरून जान्हवी व सुरेखा यांच्यात शाब्दिक बाचाबाची झाली.

त्यावेळी सुरेखाच्या घरात गाण्याचा आवाज येत होता. त्यामुळे जान्हवी व तिच्या मैत्रिणीने गाण्याचा आवाज कमी करा, असे सांगितले. त्यावरून सुरेखा व तिच्या मुलगा, मुलीने खिडकी उघडून जान्हवीच्या तोंडावर कुठला तरी काळ्या रंगाचा स्प्रे मारल्यामुळे तिच्या चेहऱ्याची व डोळ्याची भयंकर आग होऊ आली. तिथून त्या एम्स हॉस्पिटलमध्ये उपचारासाठी दाखल झाल्या. सध्या ती उपचार घेत आहे. तिच्या तक्रारीवरून सिडको पोलिसांनी सुरेखा व तिच्या मुला-मुलीविरुद्ध गुन्हा दाखल केला आहे. अधिक तपास पोलीस अंमलदार भानुदास खिल्लारे करत आहेत.