खेळ रंगला, भंगला... राहत्‍या घराच्या वरच्या मजल्यावर थाटला जुगार अड्डा!;  हर्सूलमध्ये ७ जुगाऱ्यांच्या आवळल्या मुसक्या!; दीड लाखांचा मुद्देमाल जप्त

छत्रपती संभाजीनगर (मेट्रोपोलिस पोस्ट वृत्तसेवा) : जुगाराचा खेळ रंगला असतानाच अचानक हर्सूल पोलिसांनी छापा मारून जागीच ७ जुगारी पकडले. राहत्‍या घराच्या वरच्या मजल्यावर हा जुगार अड्डा सुरू करण्यात आला होता. ही कारवाई शुक्रवारी (२३ जानेवारी) सायंकाळी साडेसहाच्या सुमारास हर्सूल भागातील एकतानगरात करण्यात आली. या कारवाईने जुगाऱ्यांमध्ये खळबळ उडाली आहे.

पोलीस अंमलदार ज्ञानेश्वर ढाकणे यांनी याप्रकरणात तक्रार दिली आहे. २३ जानेवारीला सायंकाळी साडेसहाच्या सुमारास पोलीस निरीक्षक स्वाती केदार, पोलीस उपनिरीक्षक सचिन पागोटे, पोलीस अंमलदार ज्ञानेश्वर ढकणे, पालवे, बिरकलवाड, चालक पोलीस अंमलदार साळवे असे पोलीस ठाण्याच्या हद्दीत गस्त घालत होते. स्वाती केदार यांना गोपनीय बातमीदाराकडून माहिती मिळाली, की मिलींद आनंद साळवे (रा. एकतानगर, हर्सूल) हा त्याच्या घराच्या वरच्या मजल्यातील एका रूममध्ये जुगार अड्डा चालवतो. पोलिसांनी लगेचच तिथे धाव घेतली आणि जुगार अड्ड्यावर छापा मारला. तिथे मिलींद साळवे मिळून आला. तो कागदाच्या चिठ्यावर आकडे लिहून लोकांकडून पैसे घेऊन पत्त्याचा जुगार खेळवत होता.

तो पळून जाण्याच्या प्रयत्नात असताना पोलिसांनी लगेचच पकडले. तिथे शेख रफिक शेख शफिक (वय ३४, रा. रोजा बाग), शेख तौफीक अब्दुल रहिम (वय ४२, रा. जहाँगीर कॉलनी हर्सूल), चंद्रकांत गणपतराव साबळे (वय ६६, रा. पेठेनगर भावसिंगपुरा), सतिश दादाराव बुंदीले (वय ३९, रा. छत्रपती हॉलजवळ, पिसादेवी रोड हर्सूल),  इम्रान शाह लुकमान शाह (वय ४३, रा. जहाँगीर कॉलनी हर्सूल), जयभारत साहेबराव जाधव (वय ४२, रा. होणाजीनगर, हर्सूल) या जुगाऱ्यांना पकडण्यात आले. त्यांच्याकडील मोबाइल, मोटारसायकली आणि रोकड  असा मिळून पोलिसांनी १ लाख ६४ हजार रुपयांचा मुद्देमाल जप्त केला. सर्व जुगाऱ्यांविरुद्ध हर्सूल पोलीस ठाण्यात गुन्हा दाखल करण्यात आला आहे. अधिक तपास पोलीस अंमलदार अनिल पालवे करत आहेत.