खून केल्यानंतर युवकाचा मृतदेह हात-पाय बांधून, गोणीत बांधून विहिरीत फेकला!; गंगापूर तालुक्यात खळबळ

गंगापूर (मेट्रोपोलिस पोस्ट वृत्तसेवा) : शेतातील विहिरीत ३० ते ३५ वयोगटातील युवकाचा मृतदेह शिल्लेगाव पोलीस ठाण्याच्या हद्दीतील शहानवाजपूर (ता. गंगापूर) शिवारात सोमवारी (२६ जानेवारी) सायंकाळी आढळल्याने खळबळ उडाली आहे. हात-पाय दोरीने बांधून पांढऱ्या प्लास्टिक पिशवीत गुंडाळून त्यावर दगड बांधून विहिरीत टाकण्यात आल्याचे दिसून आले. त्यामुळे हा खून असल्याचे प्रथमदर्शनी दिसून येत आहे.

पुरावा नष्ट करण्याच्या उद्देशाने मृतदेह विहिरीत फेकल्याचे पोलीस सूत्रांनी सांगितले. मृतदेह विहिरीत तरंगताना आढळल्यानंतर गावकऱ्यांनी शिल्लेगाव पोलिसांना कळवले. पोलिसांनी घटनास्थळी धाव घेऊन गावकऱ्यांच्या मदतीने मृतदेह बाहेर काढून उत्तरीय तपासणीसाठी गंगापूरच्या उपजिल्हा रुग्णालयात पाठवला. मृतक व्यक्तीची ओळख पटविण्याचे काम सुरू आहे. पोलीस निरीक्षक सलीम चाऊस, पोलीस उपनिरीक्षक गणेश काळे, पोलीस अंमलदार हनुमान सातपुते अधिक तपास करत आहेत.

जामगावमध्ये २८ वर्षीय तरुणाची गळफास घेऊन आत्‍महत्‍या
जामगाव (ता. गंगापूर) येथे राहत्‍या घरात गणेश बबन दरेकर (वय २८) या तरुणाने गळफास घेऊन आत्महत्या केली. ही घटना सोमवारी (२६ जानेवारी) सकाळी ११:३० च्या सुमारास उघडकीस आली. गणेश आई- वडिलांसह राहत होता. आई- वडील कामानिमित्त बाहेर गेले असता गणेशने दोरीच्या साह्याने घरातील छताला गळफास घेतला. आई, वडील घरी आल्यानंतर ही बाब समोर आली. गणेशला गंगापूर येथील उपजिल्हा रुग्णालयात आणले असता डॉक्टरांनी तपासून मृत घोषित केले. गंगापूर पोलिसांनी आकस्मिक मृत्यूची नोंद केली आहे. आत्महत्येचे कारण अद्याप समोर आलेले नाही. अधिक तपास पोलीस अंमलदार विजय पाखरे करत आहे.

गाजगावमध्ये शेतकऱ्याची आत्‍महत्‍या
गंगापूर तालुक्यातील गाजगाव येथे कर्जबाजारीपणाला कंटाळून ४७ वर्षीय शिवनाथ अण्णा रावते या शेतकऱ्याने शेतातील लिंबाच्या झाडाला गळफास घेऊन आत्‍महत्‍या केली. त्यांच्या पश्चात आई, वडील, दोन भाऊ, पत्‍नी,, एक मुलगा, तीन मुली असा परिवार आहे. त्यांच्यावर पीक कर्जासह इतर कर्ज होते. त्यांच्यावर गाजगावमध्ये अंत्‍यसंस्कार करण्यात आले.