हॉलची डागडुजी, डेकोरेशनवाला... आदल्या दिवशी 'लाखाचं' प्लॅनिंग ठरलं, दुसऱ्या दिवशी धक्काच बसला... चेलीपुऱ्यात काय घडलं...

छत्रपती संभाजीनगर (मेट्रोपोलिस पोस्ट वृत्तसेवा) : चेलीपुऱ्यातील आर. जी. फंक्शन हॉलजवळील फॅमिली ट्रिट डेली निडस्‌ दुकान फोडून चोरट्याने १ लाख १० हजार रुपयांचा मुद्देमाल जप्त केला. ही घटना रविवारी (२५ जानेवारी) सकाळी समोर आली. सिटी चौक पोलिसांनी चोरट्याविरुद्ध गुन्हा दाखल केला आहे.

काझी निसारउ‌द्दीन फारोकी काझी नासेरो‌द्दीन फारोकी (वय ४४, रा. खास गेट जिन्सी) यांनी या प्रकरणात तक्रार दिली आहे. ते फराहाना अहेमद युसूफ अहेमद यांच्या आर. जी. फंक्शन हॉल, चेलीपुरा येथे १३ वर्षांपासून मॅनेजर आहेत. त्यांना मदतनीस म्हणून शेख मतीन शेख मेहबूब (रा. किराडपुरा रोशन मशिदीजवळ) आहेत. तेथेच फराहाना अहेमद यांची फॅमिली ट्रिट नावाची डेली निडस्‌ची दुकानसुध्दा आहे. ती दुकानही काझी निसारउद्दीन आणि मतीन शेख मिळून सांभाळतात. २४ जानेवारीला निसारउ‌द्दीन दिवसभर फॅमिली ट्रिट डेली निडस्‌ दुकानात होते. आर. जी. फंक्शन हॉल येथे लहान मुलाचे नाव ठेवायचा कार्यक्रम होता. हा कार्यक्रम रात्री ११ पर्यंत सुरू होता.

कार्यक्रम संपल्यानंतर दुकान बंद करण्यापूर्वी फंक्शन हॉलचे पैसे व दुकानात जमा झालेले पैसे निसारउ‌द्दीन यांनी मोजले असता १ लाख १० हजार रुपये होते. त्या पैशांमध्ये हॉलची डागडुजी करण्यासोबतच व डेकोरेशनवाल्याचे सुध्दा पैसे देणे असल्याने निसारउ‌द्दीन यांनी ते दुकानाच्या दोन गल्ल्यांमध्ये वेगवेगळे करून ठेवले. एका गल्ल्यात ५० हजार तर दुसऱ्या गल्ल्यात ६० हजार रुपये ठेवले होते. दोन्ही गल्ले लॉक करून ते घरी निघून गेले. २५ जानेवारीला सकाळी साडेआठला शेख मतीन यांनी निसारउ‌द्दीन यांना फोन केला व सांगितले की, फॅमिली ट्रिट डेली निडस्‌ची दुकान उघडण्यासाठी आलो असता दुकानाच्या चार शटरपैकी एक शटरचे लॉक तुटलेले आहे. त्यामुळे निसारउ‌द्दीन यांनी लगेचच दुकानात जाऊन पाहिले असता दुकानातील दोन्ही लॉक असलेले गल्ले उघडे दिसले. त्यातील १ लाख १० हजार रुपयेसुद्धा गायब होते. दुकानातील सीसीटीव्ही तपासले असता एक चोर दुकानातून शिरून चोरी करतान दिसला. अधिक तपास पोलीस अंमलदार जगन्नाथ जेढर करत आहेत.