बनेवाडीत फ्‍लॅट फोडून चोरट्यांनी लांबवले ५ लाखांची रोकड!

छत्रपती संभाजीनगर (मेट्रोपोलिस पोस्ट वृत्तसेवा) : सातारा पोलीस ठाण्याच्या हद्दीतील बनेवाडी येथील पटेल प्राइडमध्ये ४ चोरांनी फ्लॅट फोडून ५ लाख रुपयांची रोकड लंपास केली. ही घटना सोमवारी (२६ जानेवारी) पहाटे तीनला घडल्याचे सीसीटीव्ही फूटेजवरून समोर आले आहे. चार चोरट्यांविरुद्ध सातारा पोलिसांनी गुन्हा दाखल केला आहे.

अनिस शब्बीर शेख (वय ४१, रा. पटेल प्राईड, बनेवाडी) यांनी या प्रकरणात तक्रार दिली आहे. ते महापालिकेच्या घनकचरा विभागात खासगी कंपनीमार्फत सुपरवायझर आहेत. त्यांचे मामा अब्दुल सत्तार अब्दुल अनवर (रा. मालेगाव जि. नाशिक) यांचा पटेल प्राईड, बनेवाडी येथे फ्लॅट असून, त्यांचे काम असल्यास ते फ्लॅटवर येत असतात. त्या फ्लॅटची चावी अनिस यांच्याकडे असते. ते फ्लॅटची देखभाल करतात. २५ जानेवारीला रात्री फ्लॅटला या कुलूप लावलेले होते. सोमवारी दुपारी साडेचारच्या सुमारास अनिस यांची पत्नी कचरा टाकण्यासाठी अपार्टमेंटच्या पायरीने खाली येत असताना अब्दुल सत्तार यांच्या फ्‍लॅटचा दरवाजा उघडा दिसल्याने त्यांनी लगेचच अनिस यांना सांगितले. अनिस यांनी पाहणी केली असता मुख्य दरवाजाचा कडी कोयंडा तुटलेला दिसला. बेडरूममध्ये ठेवलेली कंपनीची कागदपत्रे व रोख रक्कम दिसून आली नाही. सोसायटीच्या सीसीटीव्ही कॅमेऱ्याचे फूटेज पाहिले असता २६ जानेवारीला पहाटे तीनला ४ चोरांनी येऊन चोरी केल्याचे दिसले. त्यांनी एकूण ५ लाख रुपये नेले. अधिक तपास पोलीस उपनिरीक्षक गोविंद एकिलवाले करत आहेत.