छत्रपती संभाजीनगर घडला विश्वविक्रम : १,८५,००० विद्यार्थ्यांची देशभक्तीपर गितांवर सामूहिक कवायत

छत्रपती संभाजीनगर (मेट्रोपोलिस पोस्ट वृत्तसेवा) : जिल्ह्यातील तब्बल १ लाख ८५ हजार विद्यार्थ्यांनी एकाच सुरात महाराष्ट्र गीताचे समूहगान सादर करताना देशभक्तीपर गीतांवर शिस्तबद्ध आणि समरस अशा सामूहिक कवायत संचलनातून राष्ट्रभक्तीची जिवंत अनुभूती दिली. विद्यार्थ्यांच्या आवाजात उमटलेले महाराष्ट्र गीत आणि त्यांच्या पावलांतून व्यक्त झालेली शिस्त, एकात्मता व देशप्रेम यामुळे संपूर्ण वातावरण भारावून गेले. प्रजासत्ताक दिनानिमित्त (२६ जानेवारी) या अनोख्या कार्यक्रमाचे आयोजन करण्यात आले.

राज्याचे शालेय शिक्षण मंत्री दादाजी भुसे, जिल्हाधिकारी दिलीप स्वामी यांच्या संकल्पनेतून हा कार्यक्रम राबविण्यात आला. ‘संस्कार दशसूत्रीचे, रंग देशभक्तीचे’ या शीर्षकाखाली हा उपक्रम राबविण्यात आला. जिल्ह्यात १ लाख ५० हजार विद्यार्थी या उपक्रमात सहभागी होतील, असे नियोजन होते मात्र प्रत्यक्षात १ लाख ८५ हजार विद्यार्थी सहभागी झाल्याचे संयोजकांनी सांगितले. विद्यार्थ्यांच्या सहभागातून राष्ट्रप्रेम केवळ शब्दांत नव्हे तर कृतीतून व्यक्त व्हावे, या मुख्य हेतूने हा कार्यक्रम राबविण्यात आला. उपक्रमाची अधिकृत नोंद Asia Book of World Records आणि India Book of World Records या मान्यवर आंतरराष्ट्रीय संस्थांमध्ये करण्यात आली, ही गौरवास्पद बाब ठरली. जिल्ह्यात प्रत्येक तालुका मुख्यालयी तसेच जिल्हा मुख्यालयी या कार्यक्रमाचे आयोजन करण्यात आले होते.

मुख्य सोहळा राजे संभाजी सैनिक विद्यालय, कांचनवाडी येथे आयोजित करण्यात आला. सोहळ्याला विभागीय आयुक्त जितेंद्र पापळकर, जिल्हाधिकारी दिलीप स्वामी, जिल्हा परिषदेचे मुख्य कार्यकारी अधिकारी अंकीत तसेच शिक्षणाधिकारी (माध्यमिक) सौ. अश्विनी लाठकर तसेच विद्यार्थी, पालक आणि शिक्षक सहभागी होते. विक्रमाची नोंद करण्यासाठी श्रीमती रेखा सिंग या व त्यांची टीम उपस्थित होती. शानदार कवायतीनंतर जिल्ह्यातील विविध ठिकाणी कार्यक्रमाची व तेथील सहभागाची नोंद घेऊन मग विश्वविक्रमाची नोंद करण्यात आली. त्यानंतर जिल्हाधिकारी दिलीप स्वामी यांना Asia Book of Records, तर शिक्षणाधिकारी (माध्य) अश्विनी लाठकर यांना India Book of Records पुरस्कार प्रदान करून सन्मानित करण्यात आले. याचबरोबर, राज्यभरात शासकीय ध्वजारोहणानंतर एकाच वेळी अडीच कोटी विद्यार्थ्यांनी देशभक्तीपर गीतांवर सामूहिक कवायत संचलन सादर करत World Book of Records LONDON मध्ये नोंद करून एक भव्य विश्वविक्रम प्रस्थापित केला.