महिलेला धमक्या देऊन हॉटेलमध्ये भेटायला बोलावले अन्‌ गालांना चावून केले जखमी...!, सिडको बसस्थानकामागील घटना

छत्रपती संभाजीनगर (मेट्रोपोलिस पोस्ट वृत्तसेवा) : दोन महिन्यांपासून विभक्‍त राहणाऱ्या महिलेला पतीने धमक्या देत सिडको बसस्थानकामागील हॉटेलमध्ये बोलावले. तिथे दोघांत वाद वाढून तो तिच्या दोन्ही गालांना चावला आणि जवळील चाकूने पायावरही मारत जखमी केले. ही घटना २२ जानेवारीला दुपारी दीडच्या सुमारास घडली.

गारखेडा परिसरातील विजयनगरात राहणाऱ्या ३३ वर्षीय महिलेने या प्रकरणात तक्रार दिली आहे. तक्रारीनुसार, त्या बहिणीच्या घरी राहतात. त्या व त्यांचे ३५ वर्षीय पती (रा. जालना) दोन महिन्यांपासून विभक्त राहत असून पती नेहमी शिवीगाळ करून हाताचापटाने मारहाण करत असल्याची तक्रार त्यांनी पोलिसांत केलेली आहे. त्यावरून पती वारंवार फोन करून मला भेट नाहीतर मी तुला तेथे येऊन जीवे मारून टाकीन, अशी धमकी देतात, असा आरोप तक्रारीत महिलेने लावला आहे. २२ जानेवारीला सकाळी साडेअकराला महिला घरी असताना पतीचा तिला कॉल आला. तू मला भेटायला ये, नाहीतर मी छत्रपती संभाजीनगर येथे तुझ्या घरी येऊन तुझ्या बहिणीच्या मुलाला व तुझ्या भावाला तुला जीवे मारून टाकीन, अशी धमकी दिली. त्यामुळे महिलेने भेटण्यासाठी होकार दिला. सिडको बसस्टँडमागील हॉटेलमध्ये पतीने भेटायला बोलावले.

त्यामुळे त्या दुपारी दीडच्या सुमारास तिथे गेल्या. तिथे पतीने वाद घालायला सुरुवात केली. त्यावेळी महिलेने त्याला मला तुझ्यासोबत रहायचे नाही, असे म्हटले. त्याचा राग येऊन पतीने त्याच्याकडील चाकूने महिलेला मारण्याचा प्रयत्‍न केला. तो डाव्या पायावर लागून ती जखमी झाली. त्यानंतर पतीने हाताचापटाने मारहाण करून गालावर दोन्ही बाजूंनी चावून जीवे मारण्याची धमकी दिली. त्याच्या तावडीतून कशीबशी सुटून विवाहिता हॉटेलमधून बाहेर आली. घाटी रुग्णालयात उपचार घेतल्यानंतर विवाहितेने सिडको एमआयडीसी पोलीस ठाणे गाठून तक्रार दिली. त्यावरून पोलिसांनी पतीविरुद्ध गुन्हा दाखल केला आहे. अधिक तपास पोलीस अंमलदार जहीर शेख करत आहेत.