प्रोझोन मॉलच्या कूचकामी सुरक्षा व्यवस्थेचा चोरट्यांनी केला पर्दाफाश!; लाखो रुपयांची रोकड, कपड्यांची चोरी, व्यापाऱ्यांचा मॉल व्यवस्थापनावर संताप

छत्रपती संभाजीनगर (मेट्रोपोलिस पोस्ट वृत्तसेवा) : प्रोझोन मॉलच्या कूचकामी सुरक्षा व्यवस्थेचा पर्दाफाश चोरट्यांनी सोमवारी (२६ जानेवारी) मध्यरात्री केला. मागील बाजूने मॉलमध्ये शिरत अक्षरशः धुमाकूळ घालत  लाखो रुपयांची रोकड आणि कपडे चोरून नेले. या घटनेने मॉलमध्ये व्यवसाय करणारे धास्तावले असून, मॉल व्यवस्थापनाच्या हलगर्जीपणावर संताप व्यक्त केला आहे. लाखो रुपयांचे भाडे भरूनही अशा पद्धतीची सुरक्षा व्यवस्था त्यांच्या चिंतेचे कारण ठरत आहे.

पोलीस सूत्रांनी दिलेल्या माहितीनुसार, चोरट्यांनी तळमजल्यावरील चप्पल, बुटांच्या दालनात आधी प्रवेश केला. तेथील काउंटर फोडून चार लाख चार हजार रुपयांची रोकड चोरली. नंतर एका सलूनमध्ये शिरत २ लाख ६१ हजार रुपये रोख रक्कम व लॅपटॉप असा ६ लाख ६६ हजार रुपयांचा माल लांबवला. नंतर एका कॅफेचे काऊंटर फोडून २० हजार रुपये रोख व मोबाइल चोरला. चोरट्यांचा तब्बल ३ तास अक्षरशः धुमाकूळ सुरू असताना पहाटे ३.३० च्या सुमारास सुरक्षारक्षकांना जाग आली. त्यांनी चोरट्यांकडे धाव घेईपर्यंत चोरटे पसार होऊ लागले. एका चोरट्याला पकडण्यात यश आले, तर त्याचे साथीदार पसार झाले. रोकडसोबतच जवळपास २९ हजारांचे कपडे, चप्पलाही चोरून नेल्या आहेत. सिडको एमआयडीसी पोलीस ठाण्याच्या पोलीस निरीक्षक गीता बागवडे, सहायक पोलीस निरीक्षक भारत पाचोळे यांनी घटनास्थळी पाहणी केली. स्टोअर व्यवस्थापक सुनील काटे यांच्या तक्रारीवरून पोलिसांनी चोरट्यांविरुद्ध गुन्हा दाखल केला असून, चोरट्यांचा शोध सुरू आहे. लवकरच या गुन्ह्याचा उलगडा केला जाईल, असे निरीक्षक गीता बागवडे यांनी सांगितले.