छत्रपती संभाजीनगर (मनोज सांगळे, मो. ८७९९८३१४१० : मेट्रोपोलिस पोस्ट वृत्तसेवा) : छत्रपती संभाजीनगर तालुक्यातील लाडसावंगी गटातील निवडणुकीकडे सर्वांचे लक्ष लागले आहे. कारण या निवडणुकीत भाजप आणि शिंदे गटात प्रमुख लढत होणार असून, भाजपचे अधिकृत उमेदवार विजय उत्तमराव काळे यांना शिंदे गटाचे राधाकिसन देवराव पठाडे यांनी आव्हान दिले आहे. पठाडे यांनी निवडणुकीसाठी भाजपला सोडचिठ्ठी देत शिंदे गटाचा धनुष्य हाती घेतला आहे. हे करताना आ. अनुराधा चव्हाण यांच्यावर गंभीर आरोप केल्याने ही निवडणूक रंजक होणार आहे.
राधाकिसन पठाडे हे भाजपचे कट्टर कार्यकर्ते होते. छत्रपती संभाजीनगर बाजार समितीचे सभापती असताना त्यांनी शेतकरी हिताच्या अनेक योजना राबवल्या. सभापती पदाचा राजीनामा दिल्यानंतर त्यांना लाडसावंगी गटातून निवडणुकीची तयारी करण्यास पक्षाने सांगितले होते. त्यानुसार त्यांनी तयारीही सुरू केली होती. पठाडे हे हरिभाऊ बागडे यांचे कट्टर समर्थक मानले जातात. अलीकडील काळात ज्याप्रकारे बागडे यांच्या समर्थकांना डावलले जात आहे, त्यावरून आ. अनुराधा चव्हाण यांच्यावर आरोप होत असतात. पठाडे यांचाही पत्ता कट करताना भाजपकडून विजय काळे यांना उमेदवारी देण्यात आली. त्यामुळे संतापलेल्या पठाडे यांनी आ. अनुराधा चव्हाण यांच्यावर आरोप करत शिंदे गटाची उमेदवारी मिळवून अर्जही भरला.
विजय काळे हे पक्षातच फारसे परिचित नाहीत. ते फारसे सक्रीयसुद्धा दिसलेले नाहीत. अशात त्यांच्या गळ्यात उमेदवारीची माळ पडल्याने स्थानिक पदाधिकारी, कार्यकर्ते आश्चर्यचकीत झाले आहेत. काळे हे मूळचे लाडसावंगीचे आहेत, हीच एकमेव त्यांची जमेची बाजू आहे. राधाकिसन पठाडे हे वरझडीचे आहेत. मात्र त्यांचा संपर्क पूर्ण तालुक्यात आहे. पूर्ण जिल्ह्यात ते परिचित आहेत. लाडसावंगी ही मोठी बाजारपेठ असल्याने या भागातही त्यांचा कायम वावर राहिला आहे. बागडे यांचे कट्टर समर्थक असल्याने भाजपच्या लाडसावंगी आणि परिसरातील पदाधिकारी, कार्यकर्त्यांशी त्यांची जवळीक कायम आहे. त्यामुळे काळे हे उमेदवार भाजपचे असले तरी त्यांना निवडून आणण्यासाठी स्वतः आ. अनुराधा चव्हाण यांनाच लाडसावंगीत लक्ष घालावे लागणार आहे.
अपक्षही जोर लावणार...लाडसावंगी गटातून काँग्रेसकडून ज्ञानेश्वर श्यामराव पठाडे यांना उमेदवारी मिळाल्यामुळे नाराज झालेल्या मनोहर शेजूळ यांनी अपक्ष उमेदवारी अर्ज भरला आहे. उद्या, २७ जानेवारीच्या शेवटच्या तारखेपर्यंत त्यांनी उमेदवारी अर्ज मागे घेतला नाही तर ज्ञानेश्वर पठाडे यांच्या अडचणी वाढणार आहेत. ज्ञानेश्वर पठाडे हे आडगाव सरकचे असून, मनोहर शेजूळ अंजनडोहचे आहेत. शेजूळ यांनी लाडसावंगीत गटात काँग्रेसची वाढ करण्यात मोठी भूमिका बजावली आहे. ते कायम काँग्रेसचे सक्रीय कार्यकर्ते म्हणून वावरले आहेत. अशातच त्यांना डावलून ज्ञानेश्वर पठाडेंना देण्यात आलेल्या उमेदवारीमुळे काँग्रेस पदाधिकारी, कार्यकर्तेही द्विधा अवस्थेत सापडले आहेत. याशिवाय या निवडणुकीत राष्ट्रवादी काँग्रेसकडून हातमाळीचे बाबासाहेब म्हस्के रिंगणात आहेत. ते किती जोर लावतात हेही पाहणे रोमांचक ठरणार आहे. असे असले तरी मुख्य लढत ही भाजप-शिंदे गटात होणार आणि अपक्ष उमेदवार मनोहर शेजूळ हे जोर लावणार, असे सध्याचे चित्र आहे.
.jpg)
