सांजूळ धरणावर बर्थ डे पार्टी; पोहण्याचा मोह झाला अन्‌ धरणातील उडीने थेट यमदारी!

फुलंब्री (सीएससीएन वृत्तसेवा) : फुलंब्रीजवळील सांजूळ धरणात ३० वर्षीय युवकाचा पोहताना बुडून मृत्यू झाला. ही घटना रविवारी (१३ जुलै) दुपारी तीनच्या सुमारास घडली. समाधान सीताराम वाकळे (रा. सेनगाव, जि. हिंगोली, ह. मु. कुंभेफळ, ता. छत्रपती संभाजीनगर) असे मृत्‍यू झालेल्या युवकाचे नाव आहे. समाधान आणि त्‍याचे मित्र वाढदिवसाची पार्टी करण्यासाठी आले होते.

सांजूळ धरण भरत आल्याने ते पाहण्यासाठी आणि परिसरात पर्यटनासाठी अनेक जण येत आहेत. शेंद्रा एमआयडीसीतील ग्रीव्हज कॉटन कंपनीतील १५ ते २० कामगार मित्र रविवारी सुट्टी असल्याने एका मित्राचा वाढदिवस साजरा करायला या भागात आले होते. दुपारी १२ च्या सुमारास सोबत आणलेले जेवण त्‍यांनी केले. यावेळी समाधानला धरणाच्या पाण्यात पोहण्याचा मोह झाला. तो पाण्यात उतरला. कमी खोल असलेल्या पाण्यात पोहताना अचानक तो खोल पाण्यात पोहोचला. त्‍यानंतर एकाएकी बुडू लागला. ही बाब त्‍याच्या मित्रांच्या लक्षात येताच त्‍यांनी आरडाओरड केली.

११२ हेल्पलाइनला कॉल केला असता, फुलंब्री पोलीस व अग्निशमन यंत्रणा घटनास्थळी आली. मात्र तोपर्यंत समाधानचा मृत्‍यू झाला होता, अग्निशमन दलाच्या जवानांनी मृतदेह बाहेर काढून उत्तरीय तपासणीसाठी घाटी रुग्णालयात पाठविला. यावेळी अग्‍निशमन दलाचे रमेश सोनवणे व त्‍यांचे ४ सहकारी, फुलंब्री पोलीस ठाण्याचे सहायक पोलीस निरीक्षक संजय सहाणे, पोलीस अंमलदार सुनील सोनवणे, दिनकर पांढरे, प्रमोद म्‍हसलकर घटनास्‍थळी होते. दरम्‍यान, दुसऱ्या एका घटनेत फुलंब्री तालुक्‍यातील बोधेगाव खुर्द येथे शनिवारी (१२ जुलै) सायंकाळी खदानीत पोहताना राजदीप सुनील वाघ (वय १८, रा. बोधेगाव खुर्द) याचा मृत्‍यू झाला.