भरधाव कारने दुचाकीला उडवले, एकाचा मृत्‍यू, एक गंभीर, गंगापूर तालुक्‍यातील दुर्घटना

गंगापूर (गणेश म्‍हैसमाळे : सीएससीएन वृत्तसेवा) : भरधाव कारने दुचाकीला उडवले. यात दुचाकीवरील एकाचा जागीच मृत्‍यू तर दुसरा गंभीर जखमी झाला आहे. ही दुर्घटना गंगापूर- वैजापूर रस्‍त्‍यावर जाखमाथवाडीजवळ (ता. गंगापूर) आज, ६ जून सायंकाळी साडेपाचच्या सुमारास घडली.

निजाम बाबू शेख (वय ५३, रा. मुद्देशवाडगाव, ता. गंगापूर) असे मृत्‍यू झालेल्याचे नाव आहे. दीपक स्वरूपचंद दारूटे, (वय ४०, रा. मुद्देशवाडगाव) असे गंभीर जखमीचे नाव आहे. निजाम शेख व दीपक दारूटे दुचाकीने (क्र. एमएच २० सीएफ ६५९४) गंगापूरहून मुद्देशवाडगावला गावी परतत होते. गंगापूर शहराजवळील जाखमाथवाडी येथे विठ्ठल आश्रमानजीक समोरून भरधावयेणाऱ्या कारने त्यांना धडक दिली. अपघातानंतर कार (एमएच २० जीव्ही २७१२) तिथेच सोडून चालक फरारी झाला. दीपक दारूटे यांना तत्काळ गंगापूरच्या उपजिल्हा रुग्णालयात आणि नंतर छत्रपती संभाजीनगरच्या घाटी रुग्णालयात हलविण्यात आले. निजाम शेख यांच्या पश्चात पत्नी व तीन मुले असा परिवार आहे. मृत शेख व जखमी दारुंटे यांच्या नातेवाईकांसह मुद्देश वाडगावचे ग्रामस्थ मोठ्या संख्येने गंगापूर पोलीस ठाण्यात आले होते. जोपर्यंत कारचालकाला ताब्यात घेणार नाही तोपर्यंत शेख यांची उत्तरीय तपासणी करू देणार नाही, असा पवित्रा त्यांनी घेतला होता. पोलिसांनी ग्रामस्थांची समजूत काढली. अपघाताची नोंद गंगापूर पोलिसांनी घेतली आहे.