कर्जबाजारीपणाचा फास : पित्‍याच्या आत्‍महत्‍येच्या ५ महिन्यांतच मुलानेही केली आत्महत्या!, सोयगाव हा...
कर्जबाजारीपणाचा फास : पित्‍याच्या आत्‍महत्‍येच्या ५ महिन्यांतच मुलानेही केली आत्महत्या!, सोयगाव हादरले, बँकवाले वेठीस धरत होते का, याचा तपास होण्याची गरज
सोयगाव (सीएससीएन वृत्तसेवा) : ५ महिन्यांपूर्वीच वडिलांनी कर्जबाजारीपणातून आत्महत्या केली. त्यानंतर २५ वर्षीय मुलानेही बुधवारी (२ जुलै) सायंकाळी सहाला गळफास लावून घेतला. ही दुर्दैवी घटना सोयगाव तालुक्यातील निंबायती येथे घडली. मयूर रामलाल राठोड (वय २५) असे आत्महत्या केलेल्या तरुण शेतकऱ्याचे नाव आहे. पित्‍याच्या कर्जासाठी त्‍याला खासगी बँकवाले वेठीस धरत होते का, याचा तपास होण्याची गरज […]
सोयगाव (सीएससीएन वृत्तसेवा) : ५ महिन्यांपूर्वीच वडिलांनी कर्जबाजारीपणातून आत्महत्या केली. त्यानंतर २५ वर्षीय मुलानेही बुधवारी (२ जुलै) सायंकाळी सहाला गळफास लावून घेतला. ही दुर्दैवी घटना सोयगाव तालुक्यातील निंबायती येथे घडली.
मयूर रामलाल राठोड (वय २५) असे आत्महत्या केलेल्या तरुण शेतकऱ्याचे नाव आहे. पित्‍याच्या कर्जासाठी त्‍याला खासगी बँकवाले वेठीस धरत होते का, याचा तपास होण्याची गरज आहे. कर्जबाजारीपणामुळे मयूरचे वडील रामलाल चतरू राठोड (वय ५२) यांनी निंबायती शिवारात शेतातील लिंबाच्या झाडाला गळफास घेऊन आत्महत्या केल्याची घटना १६ जानेवारी सकाळी घडली होती. राठोड यांच्याकडे एकत्रित कुटुंबात दोन एकर शेती असून, त्यांच्यावर बँकेसह खासगी ३ लाख रुपये कर्ज होते.
पित्‍याच्या आत्‍महत्‍येनंतर कुटुंबाची जबाबदार मयूरवर आली होती. आधीच कर्जाचा डोंगर, त्यातच दुबार पेरणीचे संकट ओढवले आहे. त्यामुळे कर्ज कसे फेडावे या विवंचनेत मयूर होता. चिंताग्रस्त मयूरने घरातच बुधवारी सायंकाळी सहाला गळफास घेतला. ही बाब कुटुंबीयांच्या लक्षात येताच त्‍याला सोयगाव ग्रामीण रुग्णालयात आणले. मात्र डॉक्‍टरांनी तपासून मृत घोषित केले. मयूरच्या पश्चात आई, दोन बहिणी, काका असा परिवार आहे. जरंडीचे माजी सरपंच अमृत राठोड यांचा तो पुतण्या होय.
